Umukinnyi w’ikipe y’igihugu y’u Rwanda ya Basketball, Axel Mpoyo, yemeje ko atazakina mu mikino yo gushaka itike ya FIBA World Cup, izaba hagati ya tariki ya 27 kugeza ku ya 30 Ugushyingo 2025 muri Tunisia.
Uyu musore w’imyaka 28 ukinira imbere nka power forward mu ikipe ya APR Basketball Club, yavuze ko impamvu atazitabira iyo mikino ari uko ataramara gukira neza imvune yagize imaze igihe imubuza kugaruka mu kibuga.
Iyi mvune ni nayo yamubujije kwitabira irushanwa rya AfroBasket 2025 ryabereye muri Angola muri Kanama uyu mwaka.
Mpoyo ni umwe mu bakinnyi b’Abanyarwanda bagaragaza urwego rwo hejuru n’ubwitange mu ikipe y’igihugu, akaba yarayihagarariye mu marushanwa atandukanye mpuzamahanga arimo FIBA AfroBasket 2021 ndetse n’indi mikino myinshi yo gushaka itike.
Ni umukinnyi w’umuhanga wakiniye amakipe akomeye mu Rwanda,Rwanda Energy Group (REG) aho yayikiniye mu mwaka wa shampiyona wa 2021–2022, ayifasha kwegukana igikombe cya shampiyona y’igihugu ndetse ahabwa igihembo cya MVP (Umukinnyi mwiza kurusha abandi).
Muri uyu mwaka wa 2025, Mpoyo yanditse amateka muri BAL akinira APR BBC atsinda inshuro10 amanota atatu (three-pointers) mu mukino wo guhatanira umwanya wa gatatu, akuraho agahigo gashya kari gasanzwe gafitwe na Will Perry wari watsinze amanota 9.
Nubwo Mpoyo atazitabira iyi mikino, ikipe y’igihugu izitabira imikino yo gushaka itike ya FIBA World Cup 2025 izaba ifite abakinnyi bashya barimo Brillant Brave Rutsindura, umukinnyi uba muri Leta Zunze Ubumwe za Amerika ukinira imbere (power forward), wanakniye u Rwanda mu irushanwa rya U-18 AfroBasket 2022 ryabereye muri Madagascar.
Hari kandi Dylan Kayijuka, kapiteni w’ikipe y’igihugu y’abatarengeje imyaka 18, wahawe bwa mbere amahirwe yo gukinira ikipe nkuru y’igihugu.
Uyu mukinnyi ukina nka point guard yatorewe kuba MVP (Umukinnyi mwiza kurusha abandi) mu irushanwa rya Giants of Africa Basketball Tournament 2025, nyuma yo gufasha u Rwanda gutsinda Senegal 27–24 mu mukino wa nyuma w’abahungu.
Undi uri mu bakinnyi bashya ni David Joseph McCormack w’imyaka 26, ukina imbere (forward) aka asanzwe akinira Bayern Munich yo mu Budage muri Bundesliga Basketball League (BBL) ndetse no muri EuroLeague.
Mu bakinnyi basubijwe mu ikipe y’igihugu, harimo Jean-Jacques Nshobozwabyosenumukiza, wagarutse nyuma yo kutagaragara muri AfroBasket yabereye muri Angola kubera imvune.
Ikipe y’u Rwanda ikomeje imyiteguro izayifasha kwitwara neza muri iyi mikino yo gushaka itike ya FIBA World Cup ibura iukwezi kumwe..
