Impera z’icyumweru gishize zasize hamenyekane amakipe 4 azakina imikino ya kamarampaka yishakamo ikipe izatwara igikombe cya Shampiyona y’icyiciro cya mbere muri basketball mu bagabo ariyo Patriots BBC, APR BBC, REG BBC na RSSB Tigers, naho AZOMCO BBC na Inspired Generation zimanuka mu cyiciro cya kabiri.
Mu mpera z’icyumweru hakinwe imikino 4 ku wa Gatanu tariki 17 Nyakanga no ku Cyumweru tariki 19 Nyakanga 2026.
Ku wa Gatanu, RSSB Tigers BBC yatsinzwe na REG BBC amanota 102-86 naho Patriots BBC itsinda APR BBC amanota 69-67.
Ku Cyumweru, AZOMCO yatsinzwe na Kepler BBC amanota 100-87 naho UGB itsindwa na RSSB Tigers amanota 93-78.
Kugeza ubu hakaba habura umukino umwe gusa kugira ngo imikino isanzwe ya Shampiyona irangire. Uyu mukino ukaba uteganyijwe kuzaba ku wa Gatanu tariki 24 Nyakanga 2026 muri Petit Stade i Remera saa mbiri z’ijoro, ukazahuza RSSB Tigers na APR BBC.
Uyu mukino ufite igisobanura gikomeye kuko ni wo uzagena uko amakipe azahura mu mikino ya kamarampaka nyuma yo kumenya uko azakurikirana ku rutonde ntakuka rwa Shampiyona bitarasobanuka kugeza ubu.
Kugeza ubu urutonde rwa Shampiyona ruracyayobowe na Patriots BBC n’amanota 29, APR BBC ni iya kabiri n’amanota 28 bivuze ko isabwa gutsinda umukino wa nyuma kugira ngo izahite iba iya mbere, REG BBC ni iya gatatu n’amanota 27 naho RSSB Tigers ni iya kane n’amanota 26 bivuze ko isabwa gutsinda umukino ifitanye na APR BBC kugira ngo izace kuri REG BBC.
Mu buryo budasubirwaho Kepler BBC yarangije ari iya gatanu n’amanota 23, inganya na UGB ya gatandatu, EAUR BBC ni iya karindwi n’amanota 22, AZOMCO ni iya munani n’amanota 19 naho Inspired Generation yarangije ari iya cyenda ari nayo ya nyuma n’amanota 16.
Bidasubirwaho kandi amakipe ya AZOMCO yari imaze imyaka ibiri mu cyiciro cya mbere na Inspired Generation yarimaze umwaka umwe mu cyiciro cya mbere zamaze kumanuka mu cyiciro cya kabiri.
Kuri uyu wa kabiri tariki 21 Nyakanga 2026 haratangira imikino ya kamarampaka yo mu cyiciro cya kabiri izagena amakipe 2 azazamuka mu cyiciro cya mbere agasimbura AZOMCO na Inspired Generation.
Iyi mikino izahuza Kicukiro Buckets na VJN Ujamaa, Keplerian na Kigali Elite, Intare na Espoir, naho UR Kigali ikine na Elite BBC.
