Umuhanzi Bruce Melody, agiye guhurira mu gitaramo n’abahanzi bakomeye bo ku mugabane w’Afurika no hanze yawo, kizabera muri Kenya muri uku Kuboza.
Iki gitaramo giteganyijwe tariki ya 28-30 Ukuboza 2024, cyiswe ‘Raha Fest’, kizahuriramo abahanzi batandukanye barimo Bruce Melody na Ya Levis bazaririmba tariki ya 28 Ukuboza.
Tariki ya 30 Ukuboza hazaririmba abanya-Nigeria Bnxn, Victony na Marioo wo muri Tanzania, mu gihe ku wa 31 Ukuboza hategerejwe umuhanzikazi Shenseea ukomoka muri Jamaica, Ali Kiba wo muri Tanzania na Joshua Mubaraka wo muri Uganda.
Bruce Melody asanzwe afite abafana mu gihugu cya Kenya, dore ko yagiye ahakorana indirimbo zakunzwe na bamwe mu bahanzi baho zirimo ‘Sawa Sawa’ yakoranye na Khaligraph Jones, ‘ Diana’ yakoranye na Bahati na ‘Iyo Foto’ aherutse gukorana na Bien Aime.
