Umuhanzi w’indirimbo zo kuramya no guhimbaza Imana, Israel Mbonyi yemeje ko azataramira mu Budage mu gitaramo giteganyijwe,kuba tariki ya 26 Kamena 2026.
Abinyujije kuri konti ye ya Instagram, mu gitondo cyo kuri uyu wa Kabiri tariki ya 05 Gicurasi 2026 nibwo Mbonyi yasangije abamukurikira integuza y’iki gitaramo avuga ko yishimiye gutaramana n’abakunzi be bo mu Budage.
Iki gitaramo kizabera ahitwa Madamenweg77, kwinjira ni Amayero 35€ ku bagura amatike hakiri kare, ni mu gihe ku munsi w’igitaramo mu myanya isanzwe, ‘Regular’ itike izaba igura Amayero 50€ , ndetse n’Amayero 80€ mu myanya y’icyubahiro ‘VIP’.
Impeshyi ya 2026 Israel Mbonyi yayigeneye abakunzi b’indirimbo ze bo ku Mugabane w’i Burayi kuko ahafite ibitaramo binyuranye mu bihugu byaho , tariki ya 13 Kamena 2026 azataramira i Brussels mu Bubiligi, ndetse na tariki ya 27 Kamena 2026 akazataramira mu Bwongereza mu Mujyi wa Leeds.
Ni ku nshuro ya mbere Israel Mbonyi agiye gutaramira mu Budage, akaba agiyeyo yaramaze gutaramira mu bindi bihugu byinshi byo ku Mugabane w’i Burayi birimo : u Bubiligi, Finland, u Bwongereza, n’ibindi.
Israel Mbonyi ategerejwe mu Budage
