Umukinnyi w’Umupira, Byiringiro Lague ari mu biganiro n’ikipe ya Rayon Sports nyuma yo gusesa amasezerano n’ikipe ya Sandvikens IF yo muri Suéde.
Kuri uyu wa Mbere, tariki ya 6 Mutarama 2025, Byiringiro Lague yageze i Kigali avuye muri Suéde aho yakiniraga, yakirwa na Perezida wa Rayon sport, Twagirayezu Thaddée na Mushimire Claude, ushinzwe imishinga muri iyi kipe.
Byiringiro yagarutse mu Rwanda nyuma y’uko tariki ya 3 Mutarama 2024, yasoje amasezerano yarafitanye n’ikipe ya Sandvikens IF, yo mu cyiciro cya kabiri muri Suède, iyi kipe nayo imwifuriza ishya n’ihirwe ahandi azajya.
Amakuru dukesha ibitangazamakuru bitandukanye bikora imikino, nuko Byiringiro Lague, yaba agiye kwerekeza muri Rayon Sports benshi bita ‘Gikundiro’.
Lague yatangiye gukina muri Sandvikens IF muri Mutarama 2023, mu gihe yamazeyo iyi kipe yarazamutse iva mu cyiciro cya Gatatu, igera mu cya Kabiri cya shampiyona ya Suède.
Ni ikipe yagiyemo avuye muri APR FC yinjiyemo muri Mutarama 2018, avuye mu Intare FC yagezemo avuye muri Vision FC.
