Umukinnyi wa filime ndetse akaba n’umunyarwenya Mugisha Emmanuel uzwi ku mazina ya Clapton Kibonke, yateye mugongo ikipe ya Manchester United yarasanzwe afana ahitamo gukurikira Gasogi United avuga ko igendanye n’ibyifuzo bye.
Uyu munyarwenya ibi yabitangarije ku wa gatatu, tariki ya 18 Nzeri 2024, mu kiganiro yagiranye n’ibitangazamakuru cyagarutse ku myiteguro y’umukino wa Shampiyona y’icyiciro cya mbere mu Rwanda, uzahuza Gasogi United n’ikipe ya Rayon Sports muri Stade Amahoro, ku wa gatandatu, tariki ya 21 Nzeri 2024.
Ubwo yari ahawe ijambo mu kiganiro n’itangazamakuru, Clapton yumvikanishije ko yakozwe ku mutima no kuba ubuyobozi bwa Gasogi United bwamuhaye umwanya wo kuganira n’itangazamakuru, ati “ Ni bacye babona ayo mahirwe, igitandukanye rero kuba umufana, ndi umunyarwenya, abantu benshi banzi ku mbuga nkoranyambaga, ngirango ni nanjye murwenya ukurikiwe cyane.”
Clapton yakomeje ashimira Perezida wa Gasogi United, KNC wamwakiriye mu bafana b’iyi kipe, kandi ko amuzi nk’umuntu waharaniye igihe kinini iterambere ry’inganda ndangamuco.
Ndetse avuga ko yemeranya nawe ko bazatsinda ikipe ya Rayon Sports ati “ Umuntu uzaza kuri Sitade ntabwo azatahana agahinda, azavuga ati nubwo badutsinze ariko nishimye […] Uyu munsi turashaka gutanga ‘Bonus’ ku bafana ba Rayon Sports y’uko bazataha bishimye kandi batsinzwe.”
