Sosiyeti itegura ibitaramo ya Intore Entertainment, yatangaje abandi bahanzi n’aba-DJs bo mu Rwanda, bazasusurutsa Abanyarwanda mu gitaramo cyatumiwemo abahanzi bo muri Nigeria, Ruger na Victony, giteganyijwe tariki ya 28 Ukuboza 2024, muri BK Arena.
Aba bahanzi Nyarwanda ni Ross Kana ugezweho mu ndirimbo ‘Mami’, Davis D, Bushali, B Threy, na Bruce The 1st, bazafatanya n’aba-DJs barimo DJ Toxxyk, DJ Inno, DJ Higa & Rusam, DJ Djannab, na The Ruscombs.
Aba bahanzi batumiwe mu gitaramo cya ReVV Up Xperience, cyateguwe na Sosiyeti itegura ibitaramo ya Intore Entertainment ku bufatanye na BK Arena.
Ruger watumiwe muri iki gitaramo ni umwe mu bahanzi bakomeye mu muziki muri Nigeria no muri Afurika muri rusange, yamenyekanye mu ndirimbo zirimo ‘Asiwaju’, ‘Girlfriend’, ‘Snapchat’, ‘Bounce’ n’izindi.
Uyu muhanzi yaherukaga gutaramira i Kigali, tariki ya 19 Gashyantare 2022, mu gitaramo cyabereye kuri Canal Olympia i Rebero.
Ku rundi ruhande, Victony ni umuhanzi w’umunya-Nigeria uririmba injyana ya Hip Hop avanga na R&B, yamenyekanye mu ndirimbo zirimo ‘Soweto’, ‘Kolomento’, ‘Bastard don’t be silly’ n’izindi.
Uyu muhanzi ni ubwa mbere azaba agiye gutaramira i Kigali, mu gihe yari yitezwe mu gitaramo cya ‘Shine Boy Fest’ cy’umuhanzi Davis D, ariko bikarangira ibiganiro bidakunze.
