Umugaba Mukuru w’Ingabo z’u Rwanda, Gen MK Mubarakh, yasabye abasirikare barangije amahugurwa ya gisirikare i Nasho, gukomeza kurangwa n’ikinyabupfura, imyitwarire myiza n’ubunyamwuga, abibutsa ko ari indangagaciro zigize Ingabo z’u Rwanda (RDF).
Yabigarutseho ku munsi w’ejo ku wa Mbere, tariki ya 22 Ukuboza 2025, ubwo yitabiraga umuhango wo gusoza amahugurwa wabereye mu Kigo cya Gisirikare cya Nasho giherereye mu Karere ka Kirehe, witabiriwe n’abayobozi bakuru batandukanye mu Ngabo z’u Rwanda.
Mu ijambo rye, Gen Mubarakh yashimiye abasirikare barangije amahugurwa ku bwitange n’umurava bagaragaje mu gihe bamaze muri aya mahugurwa, anabashimira imyitwarire myiza n’ubunyamwuga byabaranze.
Yakomeje abasaba gukomeza kurangwa n’izo ndangagaciro mu nshingano zabo za buri munsi.
Ati “Ikinyabupfura ni cyo kigomba kubanza muri byose. Turi igisirikare kigendera ku myitwarire myiza n’indangagaciro z’ubunyangamugayo. Iyo indangagaciro niyo shingiro ry’ibindi byose.”
Umugaba Mukuru w’Ingabo z’u Rwanda yanakanguriye abasirikare gukoresha neza ubumenyi n’ubushobozi bungutse mu mahugurwa, babushyira mu bikorwa byo kurengera ubusugire bw’igihugu no guhangana n’ibibazo by’umutekano bishobora kuvuka.
Uyu muhango wo gusoza amahugurwa waranzwe n’imyitozo itandukanye ya gisirikare, yagaragaje ubumenyi n’ubushobozi abasirikare bungutse.
Iyo myitozo yarimo amayeri y’intambara, imyitozo njyarugamba n’iyerekeranye no kurasa, byose bigaragaza ubushobozi bw’iyo Brigade mu bikorwa by’urugamba no kubungabunga umutekano.
Amahugurwa nk’aya ategurwa mu rwego rwo kongerera abasirikare ubumenyi n’ubushobozi bikenewe, kugira ngo bashobore gusohoza neza inshingano zabo zo kurinda umutekano w’igihugu n’ahandi boherezwa mu butumwa.
