Ishyirahamwe ry’umukino wa Volleyball mu Rwanda ryatangaje ko hagiye gutangira gukinirwa igice cya kabiri (Round 2) cya Shampiyona y’Igihugu ya Volleyball yo ku mucanga (Beach Volleyball), izabera mu Karere Kayonza, ku mucanga w’inkengero z’ikiyaga cya Muhazi, kuri Falcon Golf & Country Club.
Beach Volleyball izatangira guhera kuri uyu wa Gatanu, tariki 26 Kamena kugeza ku Cyumweru tariki 28 Kamena 2026.
Iyi Shampiyona izitabirwa n’amakipe y’abagabo n’abagore aba agizwe n’abakinnyi babiri nk’uko amategeko y’uyu mukino abigena.
Shampiyona y’u Rwanda ya beach volleyball ni mpuzamahanga dore ko uretse kuba iba ku ngengabihe y’Ishyirahamwe ry’Umukino wa Volleyball mu Rwanda, FRVB, iba no ku ngengabihe y’Impuzamashyirahamwe y’Umukino wa Volleyball ku Isi, FIVB, ndetse ikaba itanga amanota mpuzamahanga ku bakinnyi baba bayitabiriye bakina beach volleyball.
Igice cya mbere cy’iyi Shampiyona (Round 1) n’ubundi cyabereye kuri Falcon Golf & Country Club mu Ukuboza umwaka ushize wa 2025, cyarangiye ikipe ya Akan Paul isanzwe ikinira APR VC na Gisubizo Merci isanzwe ikinira REG VC arizo zegukanye igikombe mu bagabo, naho mu bagore cyegukanywe n’ikipe ya Munezero Valentine na Uwiringiyimana Albertine bombi bakinira APR WVC.
Mu gice cya mbere amakipe 14 y’abakinnyi 28 n’iyo yahatanye mu bagabo naho mu bagore hahatanye amakipe 10 y’abakinnyi 20.
