Ikipe y’Igihugu y’u Rwanda yatsinzwe na Algeria ibitego 46-25 mu mikino w’umunsi wa kabiri w’Igikombe cya Afurika cy’Ibihugu muri Handball kiri kubera i Kigali.
Uyu mukino wa kabiri mu Itsinda A u Rwanda rurimo, wabereye muri BK Arena, ku mugoroba wo ku wa Kane tariki ya 22 Mutarama 2026.
U Rwanda rwari rwabonye intsinzi ku mukino wa mbere rutsinda Zambia ibitego 30-19.
Umutoza w’Ikipe y’Igihugu y’u Rwanda, Fayedh Zouabi, yabwiye abakinnyi ko hakewe kwigirira ikizere, ni mu gihe umuyobozi w’ikipe ya Handball we ashimangira ko barushijwe ubunararibonye bwo kuba nta bakinnyi benshi bafite bakina hanze y’u Rwanda.
Mu masaha yabanje, muri Petit Stade Amahoro naho hari habereye imikino y’iri tsinda, aho Nigeria yatsinze Zambia ibitego 36-18, uba umukino wa kabiri itsinze nyuma yo gutsinda Algeria ku munsi wa mbere.
Mu yindi mikino yaranze umunsi wa kabiri w’iri rushanwa, Tunisia yatsinze Guinea ibitego 35-25, Egypt itsinda Angola ibitego 41-28, Congo itsinda Benin ibitego 26-22, Gabon itsinda Uganda ibitego 33-16 naho Cape Verde itsinda Morocco ibitego 33-28.
Imikino y’umunsi wa gatatu izakinwa mu mpera z’Icyumweru ku wa Gatandatu, tariki ya 24 Mutarama 2026, aho u Rwanda ruzahura na Nigeria, mu mukino rusabwa gutsinda ngo rwongere amahirwe yo gusohoka mu itsinda.
Igikombe cya Afurika cy’Ibihugu muri Handball kiri kubera bwa mbere mu Rwanda, kuva ku wa 21-31 Mutarama 2026, ku nshuro yacyo ya 27, rihurije hamwe amakipe y’ibihugu bya Afurika 16.
