Ngwije Jean Népomuscène ukora mu Kigo cy’Igihugu cy’Igororamuco yagaragaje ko ababyeyi bari mu bagira uruhare mu bwiyongere bw’abana bo ku muhanda kubera ko na bo hari ababa badafite uburere bukwiye.
Yabigarutseho ubwo yari mu Kiganiro cyo kuri Televiziyo Rwanda cyagarutse ku kibazo cy’abana b’inzererezi n’ingamba zafashwe mu kugishakira umuti.
Ngwije Jean Népomuscène yavuze ko iyo baganiriye n’abana bakira mu bigo ngororamuco, basanga ikibazo giterwa ahanini n’amakimbirane yo mu miryango.
Yagize ati “Iyo tuganiriye na bo twumva icyabateye kujya mu buzima bw’ubuzerezi no mu muhanda, hejuru ya 90% dusanga bafite ababyeyi.”
Mu myaka itatu ishize, abana 4887 bavanwe mu mihanda basubizwa mu miryango. Aba barimo 1791 bo mu 2021/2022, 1650 bo mu 2022/2023 n’abagera kuri 1446 bo mu 2023/2024.
Ngwije Jean Népomuscène ukora mu Kigo cy’Igihugu cy’Igororamuco, yavuze ko mu 4887, abana 87% ari bo baguma mu muryango bagakomeza no kwiga.
Yakomeje ati “Hakaba na 13% bagaruka mu buzima bw’ubuzererezi.’’
Yagaragaje ko nubwo ikibazo kitarakemuka ariko kigenda kigabanuka kubera ingamba Leta y’u Rwanda yafashe.
Ati “Hari ababyeyi na bo bafite imyitwarire ikemangwa, na bo bameze nk’inzererezi.’’
Ngwije yavuze ko umuryango mugari iyo uba wumva inshingano zo kwita ku bandi kimwe, ikibazo cy’ubuzererezi cyakabaye cyararangiye burundu.
Ati “Ese mu Isibo cyangwa mu Mudugudu iyo abonye umwana w’umuturanyi agenda mu muhanda atagiye kwiga yumva ari ikibazo yagira icyo akoraho?’’
Mukamana Monique ushinzwe kurinda Uburenganzira bw’Umwana mu Kigo cy’Igihugu gishinzwe gukurikirana imikurire no kurengera umwana (NCDA) yagaragaje ko ibibazo bitera abana kujya mu muhanda bikwiye gukemurwa.
Ati “Igihe kirageze ngo duhane, igihano si ikimufunga ahubwo arakora ya mirimo. Niriwe muri stade niga uburenganzira bw’umwana n’inshingano za kibyeyi. Ibyo bihano bito bito byo kumva ko ababyeyi bahari, ni ho tugomba kongera ntitwumve ko bireba minisiteri runaka.’’
Impuguke mu muryango, Ingabire Jeanne d’Arc, yavuze ko ababyeyi bakwiye kumva neza inshingano zabo zo kubyara no kurera.
Ati “Ni inshingano badasimburwaho. Igihe umubyeyi akiri mu buzima ni we wenyine wo kwibyarira no kwirerera.’’
Yavuze ko ababyeyi badakwiye kurekura inshingano zabo, bahugire mu gushaka iterambere ry’ibintu, birengagize iry’abantu.
Ati “Ababifite mu nshingano babigendamo gake, umubyeyi wataye umwana yari akwiye kuba abihanirwa. Uko byagenda kose impamvu nyinshi zatuma umubyeyi ata inshingano yari akwiye kuba azirenga.
Abahanga mu by’imibanire y’abantu bagaragaza ko ibyo kurya, kunywa, imyambaro, umwana yabihabwa n’undi muntu ariko urukundo rw’umubyeyi nta wundi warumuha.
