Umunya-Eritrea Henok Mulubrhan yegukanye Agace ka Mbere ka #TdRwanda2025 akoresheje amasaha atatu, iminota 57 n’amasegonda 52 ku ntera y’ibilometero 157,8, byatangiriye mu Rukomo i Gicumbi bigasorezwa i Kayonza.
Umunsi wa kabiri wa Tour du Rwanda wakinwe kuri uyu wa Mbere, tariki ya 24 Gashyantare 2025.
Nyuma y’agace ka mbere, Umufaransa Fabien Doubey ukinira TotalEnergies ni we wambaye umwambaro w’umuhondo, uhabwa uyoboye abandi bakinnyi ku rutonde rusange.
Umunya-Eritrea Henok Mulubrhan ni we watwaye Tour du Rwanda mu 2023. Agace yegukanye muri Tour du Rwanda 2025 kabaye aka gatatu atsinze muri iri rushanwa rizenguruka u Rwanda ku mukino w’amagare.
Izina rye rirakomeye mu mukino w’amagare kuko no mu Ukwakira 2024, Henok Mulubrhan yegukanye Shampiyona Nyafurika y’Amagare ku nshuro ya gatatu yikurikiranya.
Henok Mulubrhan yegukanye agace ka Rukomo-Kayonza nyuma yo kugerera icyarimwe ku murongo wasorejweho isiganwa n’Umunya-Israel Rotem Tene, ndetse byatumye ba komiseri bifashisha ikoranabuhanga ry’ifoto [photo finish] ngo bemeze ko yatsinze.
Agace kakinwe uyu munsi kihariwe cyane n’Umunyarwanda Munyaneza Didier ukinira Ikipe y’Igihugu wamaze igihe kirekire ayoboye isiganwa kuko kuva ritangiye kugera mu bilometero bitatu bya nyuma yari imbere.
Mike Uwiduhaye na we ukinira Team Rwanda, Umunya-Afurika y’Epfo Kieran Gordge n’Umugiriki Nikolaos Zegklis ukinira May Stars bari kumwe na Munyaneza mu bayoboye isiganwa mu bilometero byinshi ariko yaje kubacika isiganwa rigana ku musozo.
Nyuma yo kwegukana Agace ka Mbere ka Tour du Rwanda 2025, Henok Mulubrhan yatangaje ko isiganwa ritari ryoroshye.
Yagize ati “Byasabaga kuvuduka bidasanzwe, byasabye gutanga byose ngo ntsinze. Abakinnyi bavuduka bari imbere ndetse bifuzaga iyi ntsinzi.’’
“Nishimiye kongera kubonera intsinzi mu Rwanda aho mfite urwibutso rwiza. Urugendo ruracyari rurerure mbere yo kugera ku Cyumweru ndetse hari uduce tunini kandi dukomeye turi imbere.’’
Mu gace ka Rukomo-Kayonza, abakinnyi 51 ba mbere bakoresheje ibihe bimwe. Muri bo Umunyarwanda wasoreje hafi ni Byukusenge Patrick (Java-InovoTec) wabaye uwa 13.
Munyaneza Didier wa Team Rwanda wayoboye igihe kirekire yasoreje ku mwanya wa 63 [mu bakinnyi 69 bahatanye], arushwa n’uwa mbere 1’15”.
Nyuma y’agace kasorejwe mu Karere ka Kayonza, Umufaransa Fabien Doubey ukinira TotalEnergies yafashe umwambaro w’umuhondo, asimbuye Umubiligi Aldo Taillieu witwaye neza ku munsi wa mbere.
Fabien amaze gukoresha 4h01’43” mu gihe Umunyarwanda uri hafi ku rutonde rusange ari Masengesho Vainqueur wa 26, usigwa amasegonda 21, agakurikirwa na Byukusenge Patrick (Java-InovoTec) banganya ibihe.
Tour du Rwanda 2025 izakomeza ku wa Kabiri, ku munsi wayo wa gatatu, hakinwa Agace ka Kabiri kazahagurukira i Kigali kuri MIC, kagasorezwa i Musanze ku ntera y’ibilometero 112,8.
