Abahinzi b’umuceri mu kibaya cya Bugarama, bagaragaje igihombo batewe no kubura isoko ry’umuceri, aho bari basaruye toni 7000 bakagurisha 2000 gusa, undi ukabura isoko.
Iki kibazo cyaje kugarukwaho na Perezida Paul Kagame, tariki ya 14 Kanama 2024, ubwo yaramaze kwakiri indahiro ya Minisitiri w’intebe n’abadepite, avuga uburyo bitumvikana uburyo leta y’u Rwanda ishishikariza abaturage ubuhinzi, bakabukora, ariko umusaruro wabo ntubone isoko.
Uku kubura isoko byatewe ahanini n’ikurwaho ry’umusoro nyongeragaciro k’umuceri waturukaga hanze ryabaye muri 2023, ubwo habagaho itumbagira rikomeye ry’ibiciro by’umuceri, kuko uwaturukaga hanze wari muke.
Hibajijwe niba mu rwego rwo kongera isoko ry’umuceri wo mu Rwanda hatahagarikwa utumizwa hanze, ariko umuyobozi ushinzwe ubucuruzi n’ishoramari muri Minisiteri y’ubucuruzi n’inganda, Karangwa Cassien asobanura ko ataricyo gisubizo.
Mu gukemura ikibazo cy’umuceri uhingwa mu Rwanda wabuze isoko, Leta y’u Rwanda yafashe icyemezo cyo kuwugura, isobanura ko izawugaburira abanyeshuri.
