Imirimo yo kubaka uruganda rushya rutunganya amazi rwa Karenge mu Karere ka Rwamagana, no kuvugurura uruhasanzwe ngo haboneke metero kibe 48,000 z’amazi meza buri munsi, igeze kuri 60.9% ishyirwa mu bikorwa.
Ni Uruganda rutunganya amazi ruherereye mu Murenge wa Karenge mu Akarere ka Rwamagana, rukaba ruri mu mishinga iri gukorwa hagamijwe gukemura ikibazo cy’ibura ry’amazi mu Mujyi wa Kigali no mu Ntara y’Iburasirazuba.
Hari kubwaka uruganda rushya ruzaba rufite ubushobozi bwo guha abaturage amazi meza angana metero kibe 36,000 buri munsi, ndetse hari no kuvugururwa uruganda rusanzwe ruhari rwatangaga metero kibe 12,000 ku munsi.
Ibi bivuze ko hazajya haboneka metero kibe 48,000 z’amazi burimunsi, azagera ku baturage mu bice bitandukanye by’Akarere ka Rwamagana ndetse no mu Mujyi wa Kigali bikunze kurangwa n’ikibazo cy’ibura ry’amazi cyane.
Ku wa Gatatu tariki 23 Nzeri 2026, , Umunyamabanga wa Leta muri Minisiteri y’Ibikorwaremezo, Armand Zingiro, yasuye uyu mushinga ugamije gushyira mu bikorwa gahunda y’Igihugu yo gukomeza kwegereza abaturage amazi meza, areba uko imirimo iri kugenda.
Ni imirimo inakubiyemo kuvugurura no kwagura imiyoboro y’uru ruganda, biteganyijwe ko izaba yageze ku musozo biterenze umwaka utaha wa 2027.
Ubwo Inama Njyanama y’Akarere ka Rwamagana yamurikaga ibyagezweho mu myaka itanu ishize, kuva mu 2021 kugeza mu 2026, Umuyobozi w’Akarere ka Rwamagana, Mbonyumuvunyi Radjab, yavuze ko kwagura uru ruganda biri mu bikorwa bigamije kongera amazi aboneka mu Karere.
Yagize ati: “Ruzaza kongera amazi,nubwo Akarere kageze kuri byinshi mu myaka itanu ishize, hari ibibazo bikwiye gukomeza guhabwa umwanya, birimo ikibazo cy’amazi, kugira ngo ibikorwaremezo bijyane n’ubwiyongere bw’abaturage ndetse n’iterambere ry’Umujyi wa Rwamagana.”
Umushinga wose wo kwagura no kuvugurura Uruganda rwa Karenge ndetse n’imiyoboro yarwo uteganyijwe gutwara hafi miliyoni 163.4 z’amadolari ya Amerika.
