Imirimo yo kuvugurura ibishanga bitanu byo mu Mujyi wa Kigali aribyo, igishanga cya Gikondo, icya Rwampara, icya Rugenge-Rwintare, icya Kibumba n’Igishanga cya Nyabugogo izasiga hahindutse ahantu nyaburanga ho gusura no gukorera imirimo y’ubucuruzi.
Imirimo yo kubivugurura izarangira bitwaye miliyoni 80$ (arenga miliyari 101,6 Frw). Biri mu mushinga mugari wo kurimbisha imijyi biteganywa ko uzashyirwa mu bikorwa mu mujyi wa Kigali no mu yindi mijyi itandatu iwunganira.
Ibi bishanga bizatunganywa biri ku buso bwa hegitari 408, Buri gishanga kikazajya kigira umwihariko wacyo bijyanye n’aho giherereye. Ibi bishanga bizatunganywa ku buryo bugezweho bwo kwakira amazi bikayayungurura, agakomeza gutemba mu migezi asa neza.
Mu bizibandwaho ni ukwagura utugezi turi muri ibi bishanga tugatemba mu buryo bugezweho tunyuze mu nzira zizahangwa, ibidendezi byakira amazi bigabanya umuvuduko w’amazi atemba hagabanywa umwuzure ushobora gusenya ibikorwaremezo.
Hazongerwamo ibiti gakondo bitandukanye bizakurwa mu mashyamba cyimeza nka Gishwati, Mukura n’andi bidasanzwe biboneka mu mujyi wa Kigali bigamije kwigisha abazajya basura aha hantu kumenya ubwoko bw’ibiti buba mu mashyamba ya cyimeza.
Mu gishanga cya Nyabugogo hazashyirwamo ikiyaga kinini kizaba kigizwe n’amazi yayunguruwe, mu buryo bwo korohereza abashaka kwidagadurira ku mazi ku buryo kujya i Rubavu bizaba ari amahitamo ya kabiri, ndetse kakazashyirwamo n’ubwato ku bakunda gutembera mu mazi n’ibindi bikorwaremezo.
Muri ibi bishanga hazashyirwamo n’ibikorwaremezo bitandukanye bizafasha ba mukerarugendo bahasura kwidagadura.
Hazashyirwamo amasomero arimo na murandasi, ibibuga by’imyidagaduro birimo n’iby’umupira w’amaguru, inzira z’amagare n’abanyamaguru bashaka gukora siporo, kuruhuka no kwidagadura.
Umuyobozi Mukuru Wungirije w’Ikigo gishinzwe Kurengera Ibidukikije, REMA, Faustin Munyazikwiye yavuze ko hatabayemo rwagendanyi mu mezi 18 imirimo yo kubitunganya izaba irangiye. Ati “Umushinga wo kuvugurura Ibishanga byo mu Mujyi wa Kigali ugomba kuba urangiye mu mezi 18, ariko buriya imishinga igira ibyayo, gusa ubu twizeye ko imirimo izarangira mu gihe cyagenwe.”
