Ishyirahamwe ry’Umukino w’Amagare mu Rwanda (FERWACY) ku bufatanye n’Urwego rw’Igihugu rushinzwe Intwari, Imidali n’Impeta by’Ishimwe (CHENO) byateguye ku nshuro ya gatanu irushanwa ryo kwizihiza ubutwari bw’Abanyarwanda.
Isiganwa ryiswe ‘Heroes Cycling Race 2025’ riteganyije gukinwa ku wa Gatandatu, tariki ya 18 Mutarama 2025.
Ishyirahamwe ry’Umukino w’Amagare mu Rwanda, FERWACY, ryatangaje ko iri siganwa rizakinirwa mu mihanda y’i Remera, aho biteganyijwe ko rizatangirira ku Gicumbi cy’Intwari kuva saa Tatu za mu gitondo.
Abakinnyi bazaryitabira bazasiganwa ku ntera y’ibilometero 6,8. Abari mu cyiciro cy’abagabo n’abatarengeje imyaka 23 bazakora intera y’ibilometero 136, ingimbi n’abagore basiganwe ibilometero 102 mu gihe abakobwa batarengeje imyaka 23 n’abangavu bazarushanwa ku bilometero 68.
Manizabayo Eric “Karadiyo” wakiniraga Benediction Club mu Bagabo na Nirere Xaverine wa Team Amani mu Bagore, nib o begukanye Isiganwa ry’Umunsi w’Intwari “Heroes Cycling Cup” ryakinwe ku wa 20 Mutarama 2024.
Buri tariki ya 1 Gashyantare u Rwanda rwizihiza Umunsi w’Intwari. Ni umunsi ubanzirizwa n’ibikorwa binyuranye biba mu kwezi kwitirirwa ibikorwa by’ubutwari birimo n’imikino itandukanye. Insanganyamatsiko y’Umunsi w’Intwari igira iti “Ubutwari mu Banyarwanda, agaciro kacu.”
