Umukinnyi Leroy-Jacques Mickels ukinira ikipe y’Igihugu y’u Rwanda ‘Amavubi’ yerekeje mu ikipe ya SV Waldhof Mannheim ikina icyiciro cya gatatu mu Budage nyuma yo kurangiza amasezerano mu ikipe ya Zira FK yo muri Azerbaijan yakiniraga.
Leroy-Jacques Mickels atandukanye na Zira FK nyuma y’umwaka umwe yari amaze ayikinira, asubira mu Budage aho yaherukaga gukina muri 2023 ubwo yari mu ikipe ya Rot-Weiß Oberhausen.
Mickels w’imyaka 31 atandukanye na Zira FK ayikiniye imikino 32, ayitsindira ibitego 4. Iyi kipe ni nayo inakinamo myugariro w’umunyarwanda Mutsinzi Ange.
Waldhof Mannheim ni ikipe yasoreje ku mwanya wa 10 mu makipe 20 akina icyiciro cya gatatu mu Budage, ikaba yarakinnye iki cyiciro kuva muri 2019-20.
Iyi kipe iheruka gukina icyiciro cya mbere mu Budage mu mwaka wa 1989-90.
Leroy-Jacques Mickels w’imyaka 31 y’amavuko ni umukinnyi ukina ku ruhande asatira izamu wavukiye i Siegburg mu Budage ariko akaba akinira ikipe y’Igihugu y’u Rwanda ‘Amavubi’ binyuze kuri se umubyara uvuka mu Rwanda, naho mama we aturuka muri Repubulika Iharanira Demokarasi ya Congo.
Mickels amaze gutsindira Amavubi ibitego 2 mu mikino 2 amaze kuyakinira kuko yakiniye Amavubi umukino we wa mbere tariki 27 Werurwe 2026 mu mikino ya FIFA Series ubwo Amavubi yatsindaga Grenada ibitego 4-0 harimo n’igitego cya Leroy-Jacques Mickels.
Leroy-Jacques Mickels yatsinze igitego cye cya kabiri mu Amavubi tariki 30 Werurwe ubwo Amavubi yatsindaga Estonia ibitego 2-0 bigatuma ahita anegukana igikombe.
Leroy-Jacques Mickels ategerejwe mu bakinnyi baziyambazwa n’umutoza w’ikipe y’Igihugu y’u Rwanda Stephen Constantine mu mikino itegerejwe guhera muri Nzeri uyu mwaka kugeza muri Werurwe 2027 yo gushaka itike y’Igikombe cya Afurika kizabera muri Kenya, Tanzania na Uganda muri 2027.
U Rwanda ruri kumwe na Mali, Cape Verde na Liberia muri iyi mikino, rukaba ruzatangira rwakira Liberia tariki 31 Nyakanga 2026.
