AFC/M23 irashinja Guverinoma ya Repubulika Iharanira Demokarasi ya Congo kwica abaturage bo muri Kivu y’Epfo, ndetse inasaba imiryango Mpuzamahanga kutarebera ibi bikorwa biri gukorwa.
Ni ibyatangajwe n’Umuvugizi wa M23, Lawrence Kanyuka, yifashishije urubuga rwa X, avuga ko RDC ikomeje kwica abaturage bayo.
Ati: “Ndahamagarira imiryango Mpuzamahanga n’iyimbere mu gihugu kutarebera ubwicanyi Leta ya Congo iri gukorera abaturage. Iri kubica.”
Kanyuka yavuze kandi ko leta ya Kinshasa ikomeje kurunda abasirikare bayo n’intwaro ziremereye hafi n’ibirindiro bya AFC/M23. Avuga ko ibi bigaragaza umugambi wa Leta wo gukomeza kwica abaturage batuye hafi y’ibirindiro bya AFC/M23.
Uyu muvugizi yanahamije ko hari abaturage biciwe mu duce duherereye muri grupema ya Cirunga muri teritware ya Kabare tariki ya 12 Nyakanga 2025 barimo n’abo muri iri huriro.
Ati: “Izi ngabo za Leta ya Congo zishe abaturage bane muri grupema ya Cirunga. Ibi bikorwa bigaragaza neza ko iyi Leta idaha agaciro ibiganiro bikomeje ndetse n’imigambi mibi bafite.”
Ibiganiro by’i Doha byasubukuwe ku wa kane w’iki cyumweru gishize, bikaba byarahuriyemo intumwa za RDC n’iza AFC/M23, ariko uyu mutwe uvuga ko leta ntabushake nabuke iri kubigaragazamo, kuko ntishyira mu ngiro ibyagahenge izi mpande zombi zari zumvikanye.
Mu butumwa uyoboye itsinda rya AFC/M23 riri mu biganiro by’i Doha, Benjamin Mbonimpa, yasangije ku rubuga rwa X aho yavuze ko igihe cyose bageze muri Qatar biteze ko hasinywa amasezerano yo guhagarika intambara ariko Leta ya Congo ngo ibitera umugongo.
Yongeraho kandi ko iyi Leta irimo gukoresha abacanshuro muri iyi ntambara bahanganyemo. Ku rundi ruhande Leta na yo igashinja AFC/M23 kuzana amananiza muri ibi biganiro.
Kuva ibi biganiro byatangira mu kwezi kwa gatatu uyu mwaka wa 2025, hatewe intambwe ebyiri gusa harimo kuba AFC/M23 yarakuye abarwanyi bayo mu mujyi wa Walikale no mu bindi bice bihana imbibi n’uyu mujyi.
Indi ntambwe nuko impande zombi zumvikanye guhagarika imirwano nubwo itahagaze neza kuko mu bice bimwe na bimwe imirwano igikomeje.
