Minisiteri y’ubuzima ku bufatanye n’urwego rwa Polisi y’u Rwanda, batangije ubukangurambaga bw’iminsi 10 yahariwe kurwanya ikoreshwa n’icuruzwa ry’ibiyobyabwenge, mu kwitegura Umunsi Mpuzamahanga wo kurwanya ibiyobyabwenge.
Uyu munsi mpuzamahanga wo kurwanya ibiyobyabwenge uba buri mwaka ku itariki ya 26 Kamena, uyu mwaka uzaba ufite insanganyamatsiko igira iti ” Kwirinda no kuvuza ababaswe n’ibibyobyabwenge ni inshingano za buri wese.”
Mu rwego rwo gukomeza kwitegura uwo munsi, Polisi y’u Rwanda na Minisiteri y’ubuzima, batangije ubukangurambaga bwigisha abaturage ingaruka mbi zituruka ku gukoresha biyobyabwenge no gushimangira ubufatanye bw’inzego zombi mu kubihashya.
Umuvugizi wa Polisi y’u Rwanda, ACP Boniface Rutikanga ari kumwe n’umuyobozi w’ishami rishinzwe ubuzima bwo mu mutwe muri Minisiteri y’ubuzima, Dr. Darius Gishoma , bagiranye ikiganiro n’abanyamakuru kigaruka ku gukumira no kurwanya ikoreshwa ry’ibiyobyabwenge n’ingaruka zabyo.
Muri iki kiganiro gitegura uyu munsi mpuzamahanga wo kurwanya ikoreshwa n’ikwirakwizwa ry’ibiyobyabwenge hagarukwa cyane ku rubyiruko, cyane cyane abanyeshuri, hagamijwe kubakangurira kubyirinda no gushishikariza abahuye n’ikibazo kwitabira ubuvuzi.
U Rwanda rwashyizeho ingamba zikomeye mu kurwanya ikoreshwa ry’ibiyobyabwenge, bigamije kubungabunga ubuzima bw’abaturage no guteza imbere umutekano n’iterambere rusange.
Ni muri urwo rwego hashyizweho ibigo byita ku buzima n’imyitwarire y’abakoresha ibiyobyabwenge, birimo Iwawa, Gitagata, na Nyamagabe, ndetse n’imiryango itari iya Leta nka Tubiteho na Association des Guides du Rwanda (AGR) ikorana na guverinoma mu bikorwa byo gukangurira abantu kwirinda ibiyobyabwenge, cyane cyane mu rubyiruko.
Muri Werurwe 2025, Minisitiri w’Intebe, Dr. Edouard Ngirente, ubwo bari mu masengesho ya ‘National Prayer Breakfast’ nawe yongeye kugaragaza ikibazo cy’urubyiruko rukoresha ibiyobyabwenge asaba abayobozi b’amadini n’amatorero gufatanya na guverinoma mu kurwanya ikoreshwa ry’ibiyobyabwenge, cyane cyane mu rubyiruko, hagamijwe kubaka abaturage beza n’abayobozi b’ejo hazaza
UMWANDITSI: Maurice IKUZWE
