Minisitiri w’Imari n’Igenamigambi, Yusuf Murangwa, yagizwe Umuyobozi w’Inama Nkuru y’Ubuyobozi ya Banki ya Afurika y’Iburasirazuba ishinzwe Iterambere, EADB, asimbuye Matia Kasaija wo muri Uganda.
Ubuyobozi bushya bwatangajwe mu Nama Nkuru ya EADB yabereye i Kampala muri Uganda, tariki 8 Gicurasi 2026.
Minisitiri Murangwa yasihyizwe kuri uyu mwanya w’umuyobozi w’Inama Nkuru y’Ubuyobozi ya EADB asimbuye Matia Kasaija wayoboraga iyi nama kuva ku wa 1 Werurwe 2015.
Iyi nama kandi yatangirijwemo ikigega cya miliyoni 13$ kigamije gufasha urubyiruko n’abagore bafite imishinga n’ibigo bito n’ibiciriritse (SMEs) muri Afurika y’Iburasirazuba, kugirango babashe kwiteza imbere.
Banki ya Afurika y’Iburasirazuba ishinzwe Iterambere (EADB) ni ikigo cy’imari cyashyiriweho kigamije gufasha mu iterambere ry’ubukungu n’imibere myiza by’ibihugu by’abanyamuryango b’Umuryango wa Afurika y’Iburasirazuba (EAC).
Iyi banki ifasha mu gutera inkunga imishinga y’iterambere, gutanga inguzanyo z’igihe kirekire zo kubaka ibikorwaremezo binini, gutanga inguzanyo z’igihe gito nk’izo gufasha inganda ndetse n’ubucuruzi, gushora imari mu bigo by’ubucuruzi binyuze mu kugura imigabane.
Iyi banki kandi mu nshingano yayo harimo gushyigikira urubyiruko n’abagore mu mishinga iciriritse, aho itanga inguzanyo ziciriritse binyuze mu ma banki y’imbere mu bihugu nka BRD mu Rwanda, ngo zifashe abagore n’urubyiruko.
Inshingano z’umuyobozi mukuru w’Inama Nkuru y’Ubuyobozi ya Banki ya Afurika y’Iburasirazuba ni ukwemeza gahunda z’igihe kirekire n’ingamba z’ishoramari za banki, guhindura cyangwa kuvugurura amategeko n’amasezerano agenga ishyirwaho rya banki.
