Minisitiri w’Ububanyi n’Amahanga wa Somalia, Abdisalam Abdi Ali, uri mu Rwanda mu ruzinduko rw’akazi rw’iminsi ibiri, yasuye urwibutso rwa Jenoside rwa Kigali, ruherereye ku Gisozi.
Minisitiri w’Ububanyi n’Amahanga wa Somalia, yatangiye uruzinduko rw’akazi mu Rwanda guhera ku Cyumweru, tariki ya 26 Ukwakira 2025.
Minisiteri y’Ububanyi n’Amahanga y’u Rwanda yifashishije urubuga rwa X, yatangaje ko Minisitiri Abdisalam, akigera mu Rwanda, yasuye urwibutso rwa Jenoside rwa Kigali, asobanurirwa amateka y’u Rwanda mu gihe cya Jenoside yakorewe Abatutsi ndetse yunamiye inzirakarengane ziruhukiye muri uru rwibutso.
Iyi Minisiteri kandi ivuga ko Minisitiri Abdisalam yanasuye Ingoro Ndangamateka y’Urugamba rwo guhagarika Jenoside, naho ahasobanurirwa amateka y’uru rugamba.
Somalia n’u Rwanda ni ibuhugu bisanzwe bigenderana, bihuriye mu muryango w’ibihugu bya Afurika nka African Union (AU) n’indi miryango mpuzamahanga.
Ibihugu byombi byasinye amasezerano atandukanye y’imikoranire, arimo ajyanye n’ubwikorezi bw’indege yasinywe ku wa 7 Gashyantare 2020, hagati ya RwandAir na Somali Airlines, agamije koroshya ingendo zo mu kirere ndetse n’amasezerano y’ubufatanye mu by’Umutekano yasinye tariki ya 14 Kamena 2024, hagati ya Polisi y’u Rwanda (RNP) na Polisi ya Somalia (SPF).
Ibihugu byombi kandi bifitanye amasezerano y’Ubucuruzi n’Ishoramari ndetse impande zombi zagiye zigirirana ingendo zigamije gusura no gushimangira umubano w’ibihugu byombi mu bubanyi n’amahanga ndetse n’iterambere.
