Minisitiri w’Urubyiruko n’Iterambere ry’Ubuhanzi, Dr Utumatwishima Jean Abdallah, yashimangiye ko umuco n’ururimi rw’Ikinyarwanda biri mu bintu by’ingenzi bihuza Abanyarwanda asaba urubyiruko gushyira ku isonga uru rurimi.
Ibi bikubiye mu butumwa yahaye urubyiruko kuri uyu wa kabiri tariki 24 Gashyantare 2026, mu biganiro yagiranye n’urubyiruko rwo mu ‘Ishuri Umuco’ ry’i Liège mu Bubiligi rumaze iminsi mu ruzinduko mu Rwanda.
NI mu gihe kandi u Rwanda rwizihizaga Umunsi Mpuzamahanga w’Ururimi kavukire wa 2026 ku nshuro ya 23.
Minisitiri Utumatwishima, yashimangiye ko mu bintu by’ingenzi Abanyarwanda basangiye, umuco ndetse n’ururimi rw’Ikinyarwanda biza muri bitatu bya mbere yibutsa urubyiruko kubisigasira.
Yagize ati: “Hari ibintu bitatu by’ingenzi dusangiye twese kandi tuzahora dusangiye iteka: Igihugu cyacu, Umuco wacu n’ururimi rwacu.
Yakomeje agira ati: “Bityo, ntawutora umuco we mu rundi rurimi, kandi ntawuraga umurage we mu rurimi rutari urwe.”
Minisitiri yakomeje asaba urubyiruko gushyira Ikinyarwanda ku isonga; harimo kwandika no kuvuga neza Ikinyarwanda, guhanga ibishya mu Kinyarwanda kinoze no kwigisha abandi cyane cyane abakiri bato.
Ati: “N’iyo waba utuye kure y’u Rwanda, ushobora kugumana ururimi rwawe ku mutima, ukarutoza abo mubana, ukarwubakiraho ishema ry’Ubunyarwanda, ukanaruraga abagukomokaho”.
U Rwanda rwizihije ku rwego rw’Igihugu Umunsi Mpuzamahanga w’Ururimi Kavukire ku nshuro ya 23, ku insanganyamatsiko: “Dukoreshe, tunoze Ikinyarwanda hose”, mu gihe Isi muri rusange yizihizs uyu munsi tariki 21 Gashyantare buri mwaka.
Isuzumabipimo ku murage ndangamuco w’u Rwanda rya 2025, ryerekanye ko Abanyarwanda bangana na 70.6% bahamya ko Ikinyarwanda kidakoreshwa neza muri iki gihe, haba mu myandikire ndetse no mu mivugire.
