Urwego rw’Igihugu rw’Iterambere (RDB), ku bufatanye n’Akarere ka Nyagatare, byateguye ihuriro ry’ishoramari ryitwa ‘Nyagatare Investment Forum’, rigamije kugaragariza abashoramari amahirwe ari muri aka karere, n’uburyo bashobora kuyabyaza umusaruro binyujijwe mu ishoramari.
Iyi nama yabaye kuri uyu wa gatanu tariki 22 ugushyingo 2024, yitabiriwe n’abashoramari barenga 200, barimo ibigo bya Leta ndetse n’abikorera bo mu ngeri zitandukanye.
RDB yasobanuye ko ari umwanya mwiza wo gutanga amakuru ku buryo bwo gushora imari muri Nyagatare, ndetse no kugaragaza amahirwe ari mu nzego zinyuranye zirimo ubuhinzi, ubworozi, inganda, ubukerarugendo, ndetse n’ikoranabuhanga.
Iri huriro ryatanze umwanya ku bashoramari bashaka kumenya ibijyanye imishinga yo gushoramo imari, n’uburyo bwo kubona ibikenewe byose mu gushyira mu bikorwa imishinga yabo.
Mu Nama y’Ishoramari ya Nyagatare, Umuyobozi Mukuru w’ishami ry’Isoko ry’Ibikorwa muri RDB, Umurungi Michelle, yagaragaje uruhare rwa RDB mu gushyigikira ishoramari
Ati “RDB ifite inshingano zo guteza imbere ubukungu binyuze mu gushyigikira abashoramari b’imbere mu gihugu no hanze yacyo, tubaha amakuru yose, ibyangombwa, ndetse n’ibyemezo byose bibafasha gushora imari mu Rwanda. Tunashyigikira ibigo mu gusangira amakuru y’isoko no kubafasha kugera ku masoko y’ibicuruzwa byabo.”
Iri huriro ahanini rihamagarira abashoramari n’abacuruzi kwiga ku mahirwe ahari mu yo gushoramo imari n’uburyo bwo gushora imari, hagamijwe gukoresha ikoranabuhanga no guteza imbere ubukungu burambye.
