Ikigo Nderabuzima cya Bugaragara kiri mu Murenge wa Rwimiyaga, Akarere ka Nyagatare, kigeze kure umushinga wo kubaka inzu nshya y’ababyeyi (maternité), yitezweho kugabanya ubucucike no kunoza imitangire ya serivisi z’ubuzima.
Iyi nyubako nshya igeze kuri 90% igamije gukemura ikibazo cy’ubucucike bw’ababyeyi bagiye kubyara cyagaragaraga muri iki kigo nderabuzima, aho mu busanzwe cyakira ababyeyi bari hagati ya 120 na 140 buri kwezi.
Ubu bucucike ni kimwe mu bibazo bikomeye byatumaga serivisi z’ubuvuzi mu Kigo Nderabuzima cya Bugaragara zidakorwa mu buryo bwihuse kandi bufite ireme.
Byitezwe ko nyuma yo kuzura kw’iyi nyubako, ababyeyi bazabona serivisi mu buryo bworoshye kandi bwihuse.
Imirimo yo kubaka iyi nyubako igeze hafi ku musozo, aho ibikenewe byose birimo ibyumba byo kwakira ababyeyi n’ibikoresho by’ubuvuzi byamaze kugeramo.
Ubuyobozi bw’Akarere ka Nyagatare buvuga ko iyi nyubako nshya ari igisubizo ku babyeyi n’abana bajyaga gushaka serivisi z’ubuzima mu Kigo Nderabuzima cya Bugaragara.
