Umuforomo w’imyaka 39 ukorera mu Kigo Nderabuzima cya Ruheru, giherereye mu Karere ka Nyamasheke, yatawe muri yombi n’Urwego rw’Igihugu rw’Ubugenzacyaha RIB, akurikiranyweho icyaha cyo gufata ku ngufu umukozi w’isuku w’imyaka 25.
Amakuru y’ibanze yagaragaje ko uyu muforomo yasambanyije umukozi ushinzwe isuku ubwo bombi bari basoje akazi mu masaha y’ijoro.
Amakuru dukesha IGIHE avuga ko iki cyaha cyabereye mu Mudugudu wa Musaka, Akagari ka Raro mu Murenge wa Kanjongo, aho icyo kigo nderabuzima giherereye, ku itariki ya 30 Ukuboza 2024.
Urwego rw’Igihugu rw’Ubugenzacyaha (RIB) rwatangaje ko uyu muforomo yafashwe ku itariki ya 6 Mutarama 2025, akaba afungiye kuri Sitasiyo ya RIB ya Kanjongo. Iperereza rikomeje gukorwa kugira ngo dosiye ye ishyikirizwe Ubushinjacyaha.
