Abaturage bo mu Murenge wa Nyabimata na Muganza mu Karere ka Nyaruguru barishimira ikiraro cyo mu kirere cya Gihemvu bubakiwe, gisigaye kibafasha kwambuka Umugezi wa Giswi batikandagira.
Iki kiraro cyubatswe ku bufatanye bw’Akarere ka Nyaruguru n’Umuryango Bridges to Prosperity, cyuzuye gitwaye asaga miliyoni 191 Frw, gifite uburebure bwa metero 80.
Abaturage bavuga ko mbere yo kubakirwa iki kiraro, bagorwaga no kwambuka Umugezi wa Giswi ndetse hari n’abahasize ubuzima kubera kuwugwamo.
Gusa kuri ubu aba baturage bahamya ko iki kiraro kizabafasha mu guteza imbere ubucuruzi, uburezi, ubuzima n’ibindi bikorwa by’iterambere muri aka gace.
Umunyamabanga Nshingwabikorwa w’Akagari ka Nyabimata, Murebwayire Thérèse, yabwiye RBA ko ikiraro cya Gihemvu cyafunguye inzira y’iterambere ku baturage bo mu Mirenge ya Nyabimata na Muganza.
Ubuyobozi bw’Akarere ka Nyaruguru buhamya ko kuva iki kiraro cyakubakwa cyafashije abatuye i Nyabimata na Muganza kugera ku bikorwa bitandukanye, batagowe no gukora ingendo ndende cyangwa guhangana n’imbogamizi z’ubwikorezi.
