Perezida Kagame Paul yavuze ku bibazo byugarije umuryango Nyarwanda, avuga ko ari bintu inzego z’ubuyobozi zigomba guhagurukira bigahabwa umurongo.
Ni ubutumwa yatanze ubwo yagezaga ijambo ku bitabiriye amasengesho yo y’igihugu azwi nka National Prayer Breakfast ategurwa n’Umuryango Rwanda Leaders Fellowship.
Aya masengesho yitabiriwe n’abayobozi mu nzego nkuru z’Igihugu, abahagarariye amadini n’amatorero, imiryango itari iya Leta, ibihugu byabo mu Rwanda n’abandi.
Perezida Kagame yavuze ko ibibazo byinshi bigaragara biterwa n’uko ababikora baba banyoye ibiyobyabwenge bitandukanye.
Yagize ati “Hari raporo ziva mu bapolisi ziza zimbwira ko mu gihugu hari ahabaye impanuka, ariko ko 50% zatewe n’ubusinzi. Abantu baraye bicanye, umugore waraye atemwe n’umugabo, abafashwe bari mu biyobyabwenge …”
Yakomeje avuga ko mu bibazo byiganje harimo n’ibigaragara mu miryango y’abamaze igihe gito bashakanye, aho usanga umubare wa gatanya ukomeje kuzamuka.
Yagize ati “Ukumva imiryango yahungabanye, mu mago n’abana bato bagishakana bataragira n’urubyaro ukumva ngo batandukanye, ntibumvikana, bararwana, bari mu manza n’ibindi byinshi.”
Yakomeje avuga ko hagomba kubaho uruhare rwa buri wese, abayobozi ba Leta n’ab’amadini bagafatanya kwigisha no gukebura Umuryango Nyarwanda ukomeje kwangirika bigaragara.
Ati “Dushatse rero kugira ngo twuzuze inshingano zacu, ari abatuyobora mu bintu by’amadini, inyigisho zishingira kuri ibyo ng’ibyo, dukwiriye kwibuka kubikoresha uko bishobotse kugira ngo tugabanye ibihungabanya Umuryango Nyarwanda.”
Yavuze ko abantu badashakana kugira ngo bateze intambara n’impagarara, ko ahubwo bakwiye kumenya ko kubaka umuryango ari ahantu ho kuba ituze n’umunezero.
Ati “Iyo ubona umubare w’abana bashakanye ejo bundi b’imyaka umwe 29, undi 25 bashakanye n’uwa 30 aba akiri muto, ibyo bashakaniye ntabwo ari intambara, ntabwo ari ukurwana hagati yabo buri munsi. Bashakanye ngo bagire umuryango, umuryango utuze, amahoro ndetse umere neza.”
Umukuru w’Igihugu yananenze cyane imyitwarire y’abakora ibikorwa binyuranye by’urukozasoni birimo kwiyambika ubusa, avuga ko ubuyobozi bw’u Rwanda butazakomeza kubirebera.
Yagize ati “Abandi rero, abana bato ku mihanda, njya mbibona, nkurikira ibintu no ku mbuga nkoranyambaga. Intambara zirirwa ziriho. Abana bato bambara ubusa, bakajya ku muhanda bakambara ubusa. Uwambara ubusa se ararata iki twese tudafite? Nta dini ribaho ryo kwambara ubusa, nta muryango ubaho wo kwambara ubusa. Ariko burya kwambara ubusa, ntabwo ari bwa busa, burya bambaye ubusa no mu mutwe, ni ubusa buri mu mutwe ni cyo kibazo, ni ho bishingira.”
Yunzemo ati “Mbwira rero ukuntu wakwemerera Umuryango Nyarwanda kubaho gutyo, ukibwira ko nubwo twicaye hano nk’abayobozi mu nzego zitandukanye, inshingano tuzaba twuzuza ni izihe? Tuzibaze, ni izihe? Ni izambika ubusa? Abanyarwanda, ni uku abana tubarera. Hari abana, hari abakuru, ni uko turerwa? Ni uko turera?”
Perezida Kagame yasabye abayobozi kumva ko kugira igihugu gitekanye kandi gifite abantu bafite ishema ari inshingano zabo na buri Munyarwanda.
