Perezida Paul Kagame yageze i Cairo mu Misiri mu ruzinduko rw’akazi, yakirwa na mugenzi we wa Misiri, Abdel Fattah Al-Sisi ku ngoro ya Al-Ittihadiya.
Ibiro by’Umukuru w’Igihugu, Village Urugwiro, byatangaje ko aba bakuru b’ibihugu byombi bagirana ikiganiro cyihariye mbere yo guhura n’itsinda ry’abayobozi b’impande zombi.
Perezida Kagame ari kumwe n’ itsinda ry’abayobozi bamaze kugerayo barimo n’ukuriye Urwego rw’Igihugu rw’Iterambere,RDB, Jean Guy Afrika, aho yitabiriye inama ya mbere y’ubucuruzi ihuje ibihugu byombi.
Iyo nama yahuje abayobozi b’inzego z’ubucuruzi n’abashoramari b’ibihugu byombi bagamije gushakisha amahirwe, guteza imbere ubufatanye burambye no gushyigikira ubucuruzi n’ishoramari.
RDB ivuga ko ibiganiro byibanze ku nzego z’ingenzi zirimo itunganywa ry’ibikomoka ku buhinzi, inganda, ubukerarugendo n’ubukerarugendo bushingiye ku bukorikori, ubuzima n’imiti, ibikorwa by’ubwubatsi n’imiturire, ndetse n’ubucukuzi bw’amabuye y’agaciro.
Muri Kanama 2024, ibihugu byombi byagiranye amasezerano arimo agamije guteza imbere ubucuruzi, ubwikorezi, ubuzima n’ibindi.
Ibihugu byombi bisanzwe bifitanye imikorere mu by’ubucuruzi.
Imibare y’Urwego rwa Loni rushinzwe ubucuruzi, COMTRADE, igaragaza ko mu 2023 Misiri yohereje mu Rwanda ibicuruzwa bifite agaciro ka miliyoni $67.32 mu gihe u Rwanda rwoherejeyo ibicuruzwa bifite agaciro ka $437,000.
Iki gihugu kandi gitegura Imurikagurisha ‘Egypt & Middle East Expo’ riba kabiri mu mwaka, hagamijwe kongera ibicuruzwa biva muri iki gihugu ku isoko ry’u Rwanda.
