Ku cyumweru, tariki ya 15 Nzeri 2024, muri Kigali Conversation Center, habereye amasengesho yo gusengera igihugu no gushimira Imana, azwi nka ‘Thanksgiving Prayer Breaskfast’, akaba yitabiriwe na Perezida Paul Kagame na Madamu Jeanette Kagame.
Aya masengesho ategurwa n’umuryango Rwanda Leaders Fellowship, yitabiriwe n’abayozi batandukanye mu nzego nkuru z’igihugu, abayobozi b’amadini n’amatorero, abikorera n’abandi.
Aya masengesho ahanini yari agamije gushimira Imana kubw’imigendekere myiza y’amatora y’umukuru w’igihugu no kuragiza Imana manda nshya, nkuko byagarutsweho n’umuyobozi wa Rwanda Leaders Fellowship, Moses Ndahiro
Ati” “Muri Nzeri 2017, twari muri iki cyumba cya KCC mu isengesho ryo gushima Imana ku bw’amatora twari twagize n’ubuyobozi bwiza Imana yaduhaye. Icyo gihe twaragije Imana imigambi yacu y’lgihugu, yarabikoze, uyu munsi twagarutse kuyishima kuko ari Imana yo kwizerwa, Imana yumva gusenga kw’Abanyarwanda, turayishimiye.”
Ndahiro Kandi yavuze kuri Perezida Kagame, agira ati “ “Kugira Perezida ukunda Imana, agakora ibiyishimisha kandi biyubahisha, ni umugisha ukomeye cyane ku Banyarwanda, bidutera ubwuzu n’ishema”
Ijambo ry’Imana ryigishijwe n’umuyobozi mukuru wa Ellel Ministries Rwanda, Lambert Bariho, wagarutse ku mumaro w’umuco wo gushima Imana ku gihugu ndetse n’abantu muri rusange, nkuko byanditse muri Zaburi 100: 1-5.
Ati “Ntabwo Imana idutegeka kuyishimira ngo idushyireho igitsure ahubwo tuyishimira kubera ko ari nziza, kuko yatugiriye neza.”
