Ikipe ya Police FC yatsinze Etincelles FC, mu mukino w’Umunsi wa 12 wa Shampiyona y’u Rwanda, ikomeza kuyobora urutonde rw’agateganyo n’amanota 29.
Ni umukino wabaye kuri uyu wa Gatandatu, tariki ya 20 Ukuboza 2025, muri Stade Umuganda mu Karere ka Rubavu.
Police FC yari yitabaje abarimo Rukundo Onesime, Christian Ishimwe, Kamanzi, Chimezie, Yakubu, Simeon, Leonard, Kwitonda Alain Bacca, Byiringiro Lague, Kirongozi Richard na Ani Elijah, ni mu gihe mu basimbura harimo Patience, Ndizeye, Samuel, Djabel, Ssenjobe, Didier, Frodouard, Tia na Msanga.
Umukino watangiye abakinnyi b’impande zombi bagaragaza imbaraga ari nako bagerageza uburyo bwo gushaka igitego.
Ku munota wa 43 w’igice cya mbere cy’umukino, Richard Kirongozi yashyizemo igitego cya mbere cya Police FC, iki gice kirangira iyi kipe ya Polisi y’u Rwanda itsinze iyo mu Karere ka Rubavu, igitego 1-0.
Mu gice cya kabiri, Etincelles FC yakomeje gushaka uburyo yakwishyura, ari nako Police FC ishaka uburyo bushoboka yatsinda ikindi gitego.
Nubwo impande zose zakomeje kugaragaza ubushake bwo gushaka igitego, umukino warangiye nta kindi gitego kibonetse, Police FC itahana igitego 1-0 bwa Etincelles FC.
Kugeza ubu Police FC iracyayoboye urutonde rwa Shampiyona n’amanota 29, igakurikirwa na APR FC ifite amanota 23 na Marines ifite amanota 21, Rayon Sports ikagira 20.
Uretse uyu mukino mu yindi mikino yabaye kuri uyu wa Gatandatu, APR FC yatsinze Gasogi United ibitego 2-0, Musanze FC itsinda As Muhanga ibitego 3-0 mu gihe Mukura VS yatsinze Amagaju FC igitego 1-0.
Imikino izakomeza ejo ku Cyumweru, ubwo Marine FC izaba ikina na Al Hilal, Kiyovu SC izakira Rutsiro FC mu gihe Al Merrikh yakira Gicumbi FC.
