Ikipe ya Rayon Sports y’abagore yatsinze Denden WFC yo muri Eritrea ibitego 3-0 mu mukino wa CECAFA y’abagore wabereye kuri Kigali Pele Stadium kuri iki Cyumweru tariki 23 Kanama 2026.
Uyu wari umukino wa kabiri wo mu itsinda A muri CECAFA y’abagore yo gushaka itike y’igikombe gihuza amakipe yabaye aya mbere iwayo muri Afurika mu bagore, CAF Women’s Champions League.
Rayon Sports WFC na Denden WFC zombi zagiye gukina uyu mukino zishaka intsinzi kuko ku mukino wa mbere zitari zabashije kwitwara neza, Rayon Sports yari yanganyije na Mafunzo yo muri Zanzibar naho Denden yari yatsinzwe ibitego 3-0 na Yei Joint Stars yo muri Sudani y’Epfo ibitego 3-0.
Umutoza Rwaka Claude yari yakoze impinduka ebyiri (2) mu bakinnyi 11 babanje mu kibuga ugereranyije n’abo yari yabanjemo ku mukino wa mbere wa Mafunzo SC aho yakuyemo Ntakobanjila Salama na Uwanyrigira Sifa ashyiramo Niyonshuti Emerance na Ukwinkunda Jeanette.
Abandi bakinnyi babanje mu kibuga ni umuzamu Ndakimana Angeline, kapiteni Uwase Andersene, Uzayisenga Lydia, Ihirwe Regine, Mukantaganira Joselyne, Gikundiro Scholastique, Zaina Namuleme, Coralie Odette Elsie Eyeang Nguema na Umwali Uwase.
Umukino watangiye Rayon Sports irusha bigaragara Denden ndetse ikayataka cyane.
Ntibyatinze kuko ku munota wa 17 Rayon Sports yahise ifungura amazamu ku gitego cyatsinzwe na myugariro wo ku ruhande rw’ibumoso Ihirwe Regine, hadaciyeho n’umunota rutahizamu uca ku mpande Ukwinkunda Jeanette aterekamo igitego cya kabiri ku munota wa 18.
Igice cya mbere cyarangiye Rayon Sports y’umutoza Rwaka Claude iyoboye umukino n’ibitego 2-0 n’ubwo yari yagize ibyago ikavunikisha Zaina Namuleme usanzwe ukina mu kibuga ku buryo atabashije no gukomeza umukino.
Mu gice cya kabiri, Rayon Sports y’abagore yakomeje kuyobora umukino, igasatira izamu cyane inyuze mu mpande n’ubwo ntamusaruro byayihaga.
Ku rundi ruhande, Denden WFC ntiyabashakaga kugera imbere y’izamu rya Rayon Sports, kenshi yahageraga ariko uko abakinnyi ba Rayon Sports aribo bakoze amakosa bagatakaza umupira.
Rayon Sports yabonye igitego cy’agashinguracumu mu minota ya nyuma y’inyongera ku mupira wazamuwe neza na Mukantaganira Joselyne maze Ishimwe Mizero Evelyne wari winjiye mu kibuga asimbuye ahita aterekaho umutwe atsinda igitego cya 3.
Abakinnyi ba Rayon Sports y’abagabo ni bamwe mu bari muri sitade gushyigikira bashiki babo ndetse n’abayobozi batandukanye barimo Visi Perezida wa mbere ushinzwe tekiniki muri FERWAFA, Mugisha Richard n’umuyobozi wa Rwanda Premier League, Mundaheranwa Hadji Yussuf.
Uyu mukino watangiye saa 16:00 uza ukurikira uwo Yei Joint Stars FC yatsinzemo Mafunzo SC igitego 1-0 cyatsinzwe na Mary Anger ku munota wa 68.
Nyuma y’iyi mikino, Yei Joints FC iyoboye itsinda n’amanota 6 n’ibitego 4 yizigamye, Rayon Sports ni iya kabiri n’amanota 4 n’ibitego 3 yizagamye, Mafunzo SC ni iya gatatu n’inota rimwe n’umwenda w’igitego 1 naho Denden FC ni iya nyuma muri iri tsinda ntanota na rimwe ifite n’umwenda w’ibitego 6.
Imikino yo muri iri tsinda izakomeza ku Kabiri tariki 25 Kanama 2026 aho Mafunzo SC izakina na Denden FC saa 13:00 kuri Kigali Pele Stadium naho Rayon Sports ikine na Yei Joint Stars FC saa 16:00 ku kibuga cya hotel ya FERWAF iri i Remera.
Muri rusange CECAFA y’abagore irakomeza kuri uyu wa mbere aho mu itsinda C Kenya Police Bullets FC iratana mu mitwe na Simba Queens saa 13:00 naho saa 16:00 Kawempe Muslim Ladius itane mu mitwe na Commercial Bank of Ethiopia saa 16:00, imikino yombi izabera kuri Kigali Pele Stadium.
