Ikipe ya Rayon Sports y’abagore yatsindiwe ku mukino wa nyuma wa CECAFA, itsinzwe n’ikipe ya KJT Queens yo muri Tanzania, ihita itakaza amahirwe yo gukina CAF Women’s Champions League.
Uyu mukino wabaye kuri uyu wa kabiri tariki ya 16 Nzeri 2025, wabereye muri Kenya kuri Kasarani Internatinal Stadium, wasize Rayon Sports y’abagore itsinzwe igitego 1-0.
Igitego cya KJT Queens cyatsinzwe na Winfrida Gerald ku munota wa 5′ w’umukino.
Rayon Sports y’abagore yari yageze ku mukino wa nyuma itsinze Kampala Queens yo muri Uganda penaliti 4-3 nyuma yo kunganya 0-0, mu gihe KJT Queens yo yari yasezereye Police Bulletse yo muri Kenya kuri penaliti 4-2 nyuma yo kunganya igitego 1-1.
Aba bakobwa b’ikipe ya Rayon Sports bari bahagarariye u Rwanda, biharuriye inzira n’igikundiro berekana ko bashoboye bagera ku mukino wa nyuma wa CECAFA, ibintu byari bibaye bwa mbere nubwo inzozi zo kwegukana igikombe zitabaye impamo.
Iyo iyi kipe yegukana igikombe yari guhita ibona itike ya CAF Women’s Champions League izabera muri Algeria, muri uyu mwaka ndetse bagahabwa n’igihembo cy’arenga miliyoni 215 FRW (150,000 $).
Inzozi zabo kandi zo kuba ikipe y’abagore ya mbere mu Rwanda ndetse ikiyongera ku makipe atatu yabashije gukura ibikombe hanze y’igihugu mu mupira w’amaguru mu babigize umwuga, nazo zirangiriye aha.
Aya mateka yakozwe gusa na Rayon Sports y’abagabo yatwaye CECAFA mu 1998 itsinze Mlandege 2-1, byongera gukorwa n’Ikipe y’Igihugu Amavubi y’abagabo yatwaye irushanwa rya COMESA mu 2000 itsinze Zimbabwe 1-0, ndetse na ATRACO (itakibaho) yatwaye CECEFA 2009 itsinze Al Merreikh 1-0.
