Ikipe ya Rayon Sports yatangaje ko yatandukanye na Haruna Ferouz wari umutoza wungirije wayo.
Ni mu itangazo banyujije ku rubuga rwa X, kuri uyu wa Kane, tariki ya 22 Mutarama 2026.
Kuva muri Nyakanga 2025, Harouna Feruz yari umutoza wungirije muri Rayon Sports, aho yari umwe mu batoza babiri bari bungirije Afhamia Lotfi.
Mu Gushyingo 2025, Ferouz yasigaranye ikipe nyuma yaho umutoza Afhamia yirukanywe, kubera umusaruro nkene, aguma kuri izo nshingano kugera mu Kuboza 2025, ubwo Rayon Sports yatangazaga Bruno Ferry nk’umutoza mukuru.
Haruna Ferouz nawe asize ikipe ya Rayon Sports igifite umusaruro uri hasi, nyuma y’uko mu mukino uheruka wabaye ku wa Gatatu, yanganyije ibitego 2-2 n’ikipe ya Al-Merrikh, mu mukino w’umunsi wa 15 wa Shampiyona y’u Rwanda.
Ni nyuma kandi y’uko iyi kipe yari imaze gutsindwa ibitego umunani mu Cyumweru kimwe, birimo bine yatsinzwe mu mukino wayihuje na APR bahatanira igikombe cya Super Cap, nyuma y’iminsi ine itsindwa ibindi bitego 4 na Al-Hilal mu mukino wa Shampiyona y’u Rwanda.
Haruna Ferouz asize Rayon Sports iri ku mwanya wa cyenda ku rutonde rwa Shampiyona, aho ifite amanota 25 mu mikino16 imaze gukina.
