Ikigo cy’Igihugu cy’Ubuzima (RBC) cyahawe n’Ubudage Amavuriro Ngendanwa abiri (Mobile clinics) ari kumwe n’ibyuma bikonjesha imiti n’inkingo (Cold chain equipment) bizafasha mu rwego rw’ubuzima no kwegereza serivisi z’ikingira abaturage.
Ni igikorwa cyabaye kuri uyu wa kabiri tariki 5 Ugushyingo 2024. Umuyobozi wa RBC, Prof Dr Claude Muvunyi, yatangajeko ibi bikoresho bifite agaciro ka miliyoni 490 Frw, bikazafasha abaturage koroherwa no kubona serivisi zo gukingirwa mu bihe by’ibyorezo.
Aya mavuriro aje asanga andi arenga atandatu yashyizwe mu ntara z’igihugu zitandukanye yifashishwa mu gupima no gukingira ibyorezo nka Marburg na Mpox.
Amavuriro ngendanwa ni uburyo bwihariye bwo kugeza serivisi z’ubuvuzi ku baturage bo mu duce turimo imirenge itagera ku mavuriro asanzwe, cyane cyane mu bice by’icyaro n’ahari imbogamizi mu kugera ku bikorwaremezo.
