Urwego rw’Igihugu rushinzwe imfungwa n’abagororwa, RCS rurashima uruhare rwa Kiliziya Gatolika mu Rwanda mu gufasha abagororwa guhinduka, binyuze mu nyigisho z’ukwemera kwa Yezu Kristu n’amasakaramentu matagatifu.
Ibi byagarutsweho ubwo Musenyeri wa Diyosezi Gatolika ya Butare, Jean Bosco Ntagungira yagiraga uruzinduko mu Igororero rya Nyarugenge, i Mageragere kuri uyu wa 24 Ugushyingo 2024, akanatanga Isakaramentu ry’Ugukomezwa ku bagororwa 41.
Bamwe mu bagororwa bahagororerwa bishimiye kuba basuwe n’Umwepiskopi bavuga ko uyu ari umunsi utazibagirana mu mateka y’iri Gororero.
Umwepiskopi wa Diyosezi Gatolika ya Butare, Musenyeri Jean Bosco Ntagungira yavuze ko yishimiye kugaruka mu Igororero rya Nyarugenge kuko yakunze gukorera ubutumwa mu magororero na mbere y’uko aba Umwepiskopi, abashimira uko bishimiye itorwa rye nk’umwepiskopi wa Diyosezi imwe mu mpamvu yatumye ahagirira uruzinduko.
Mu izina rya Komisieri mukuru rwa RCS, ACP Emmanuel Rutayisire yashimiye Ubuyobozi bw’Igihugu bwemerera buri wese gusenga nta guhutazwa, bikagera no ku bagororwa n’uruhare rw’amadini n’amatorero by’umwihariko Kiliziya Gatolika mu kubafasha mu nshingano baba bafite zo gufasha abagororwa guhinduka.
Ubuyobozi bw’igororero rya nyarugenge butangaza ko ryubatswe mu 2013 ritahwa mu 2017, rikaba ribarizwamo abagororwa ibihumbi 11,597 barimo abagabo ibihumbi 10,082 n’abagore ibihumbi 1,515. Harimo kandi n’abana 120 bari kumwe n’ababyeyi babo bitewe ni uko bakiri bato n’abanyamahanga 118.
Ni mu gihe abakirisitu Gatolika babarizwa muri iryo gororero ari 1959 barimo abagabo 1624 n’abagore 335.
Inkuru ya Marie Jeanne UMUTONI, Radio Salus
