General Christian Tshiwewe Songesa n’abagenzi be batatu batawe muri yombi kubera gukekwaho gushaka guhirika ubutegetsi bwa perezida Felix Tshisekedi muri Repubulika iharanira demokarasi ya Congo.
Amakuru aturuka i Kinshasa avuga ko General Christian Tshiwewe ari we wari uyoboye uwo mugambi watangiye gutahurwa mu ntangiriro ziki cyumweru turimo.
Abandi aya makuru yemeza ko bari kumwe na General Christian Tshiwewe ni Lt.Gen. Jean Claude Yav, Gen Major Maurice Nyembo nundi musirikare ufite ipeti rya Colonel.
Christian Tshiwewe ukekwaho kuyobora umugambi wo gushaka guhirika ubutegetsi bwa Tshisekedi, yahoze ari umugaba mukuru w’Ingabo za Congo FARDC, kuri ubu akaba yari Umujyanama mukuru wa perezida Felix Tshisekedi mu birebana n’umutekano.
Aya makuru akomeza avuga ko kuva mu gitondo cyo kuri uyu wa kane, nta muntu winjira cyangwa ngo asohoke mu rugo rwa Gen. Christian Tshiwewe. Abashinzwe umutekano we bambuwe imbunda, kandi bamwe mu nshuti ze nabo batawe muri yombi.
Ibi bikaba bije nyuma yaho mu gitondo cyo ku wa mbere wiki cyumweru, Lt.Gen. Jean Claude Yav yari yategetswe kudasohoka mu rugo rwe n’urwego rushyinzwe iperereza ry’igisirikare.
Ndetse kuruyu wa kabiri ahita ajyanwa ku biro bya CNS guhatwa ibibazo, ariko aza kurekurwa, naho Lt.Gen Christian Tshiwewe akomeza kubazwa.
Iri joro ryaraye rikeye rishyira kuri uyu wa kane, bataye muri yombi Gen. Maurice Nyembo, wahoze ari umuyobozi w’ibiro bya Gen. Tshiwewe mu gihe yari akiri umugaba mukuru w’Ingabo za Congo.
Ni mu gihe kandi na Colonel Adelard Mwiza, nawe ushinzwe umutekano wa Gen. Tshiwewe, yaje gutabwa muri yombi mu gitondo cyo kuri uyu wa kane, nkuko aya makuru ava i Kinshasa akomeza abivuga.
Nanone kandi hari n’andi makuru avuga ko Tshiwewe azira kuba yaravuganye kuri telefone na Corneille Nangaa umuhuzabikorwa w’ihuriro rya Alliance Fleuve Congo, ribarizwamo umutwe wa M23 n’uwa Twirwaneho.
