Umuryango Mpuzamahanga ushinzwe gukemura Amakimbirane (ICG), ukurikirana ibibera mu karere k’Ibiyaga Bigari, watangaje ko Repubulika Iharanira Demokarasi ya Congo, igomba guhagarika ibikorwa by’imvugo z’urwango n’ibyibasira Abanye-Congo bavuga ururimi rw’ikinyarwanda, ibwirwa ko intambara itatanga igisubizo.
Ni mu itangazo wasohoye ku wa kane tariki ya 5 Werurwe 2026, rigaruka ku bibazo by’umutekano mucye uri mu Burasirazuba bwa Congo.
Muri iryo tangazo, rivuga ko itsinda ry’ibihugu by’Ububiligi, Denmark, Umuryango w’Ubumwe bw’u Burayi, u Bufaransa, u Budage, u Buholandi, Suède, Ubusuwisi, u Bwongereza na Leta Zunze Ubumwe za Amerika, nk’ibihugu bigize ICG, riyobowe na Suède, bifuza kugaragaza bimwe mu bikibangamiye ishyirwa mu bikorwa ry’amasezerayo ya Washington na Doha, agamije gutuma umutekano mu Burasirazuba bwa Congo ugaruka.
Aya masezerano yashyiriweho umukono i Washington ku wa 4 Ukuboza 2025, hagati ya RDCongo n’u Rwanda ndetse aya Doha na yo ku wa 19 Nyakanga 2025, hagati ya AFC/M23 na Leta ya Congo, agamije guhagarika intambara n’imirwano burundu.
ICG ivuga itewe impungenge n’uburyo impande zasinye ayo masezerano zikomeje kuyarengaho, zirenga ku gahenge kumvikanyweho ndetse zikora ibikorwa byibasira abaturage, hakoresheje indege zitagira abapilote .
Yagize iti “ Ibyo bikorwa by’ibitero bikoresheje drone z’intambara,birashyira ubuzima bw’abaturage mu kaga . Impande zombi zigomba guhagarika imirwano kandi zigasubira mu biganiro. Ntabwo intambara yatanga igisubizo.”
ICG yasabye kandi impande zose gushyira mu bikorwa inshingano n’ibyo biyemeje mu rwego rw’Amasezerano ya Washington na Doha, no kubahiriza imyanzuro ireba Akanama k’Umuryango w’Abibumbye gashinzwe umutekano ku Isi, harimo imyanzuro ya 2773 na 2808, no kubaha mu buryo bwuzuye ubusugire bw’imipaka.
Uyu muryango wasabye leta ya Congo kuhagarika ibikorwa byose byibasira Abanye-Congo bavuga ikinyarwanda.
Iti “ ICG irasaba impande zose guhagarika gushishikariza urwango, ivangura, cyangwa urugomo, harimo n’urukorerwa imiryango y’Abavuga Ikinyarwanda, n’ibindi bikorwa bishyira mu kaga gakomeye ubuzima bw’abaturage .”
Repubulika Iharanira Demokarasi ya Congo, yakomeje gusabwa gushyira mu bikorwa amasezerano yasinye yaba aya Washington na Doha ariko yo ikayirengagiza nkana, ahubwo ikajya mu ntambara byeruye, inakoresha abacanshuro b’abanyaburayi n’abo muri Amerika.
