Urwego rw’Igihugu rw’ubugenzacyaha RIB rwatangaje ko rwataye muri yombi abakozi ba FERWAFA.
Abatawe muri yombi ni Kalisa Adolphe, uzwi nka Camarade, wahoze ari Umunyamabanga Mukuru wa FERWAFA na Tuyisenge Eric, ushinzwe ibikoresho by’ikipe y’Igihugu Amavubi.
RIB yatangaje itabwa muri yombi ry’aba bayobozi kuri uyu kabiri, tariki ya 16 Nzeri 2025, ibinyujije ku rukuta rwa X.
Uru rwego ruvuga ko abatawe muri yombi bakekwaho ibyaha birimo kunyereza umutungo, ibyaha bifitanye isano na ruswa ndetse no gukoresha inyandiko mpimbano.
Batawe muri yombi hashingiwe ku iperereza ryakozwe ku bufatanye bwa RIB na Polisi y’Igihugu, ryakorewe bamwe mu bakozi ba FERWAFA bakekwaho ibyaha bitandukanye.
Abatawe muri yombi kuri ubu bafungiye kuri Sitasiyo za RIB, iya Remera na Kicukiro, mu gihe iperereza rigikomeje
RIB ivuga ko kugeza ubu dosiye ya Kalisa Adolphe yo yamaze koherezwa mu Bushinjacyaha.
Yibukije abantu kudakoresha ububasha bahabwa n’umwanya w’akazi barimo mu nyungu zabo bwite kuko bihanwa n’amategeko.
