RSSB Tigers ihagarariye u Rwanda mu mikino ya BAL 2026 yatangiye neza itsinda Al Ahly Benghazi yo muri Libya amanota 103-95 mu mukino wa mbere wa Kalahari Conference iri kubera i Pretoria muri Afurika y’Epfo.
Ni umukino wabaye kuri uyu wa gatanu taliki ya 27 Werurwe mu nzu y’imikino ya SunBet Arena i Pretoria ho muri Afurika yepfo aho RSSB-Tigers yabonye intsinzi yayo ya mbere mu mateka yiri rushanwa dore ko ari ubwa mbere irikinnye.
Muri uyu mukino wabimburiye indi Al Ahly Benghazi ni yo yahabwaga amahirwe kuko yaherukaga mu mikino ya BAL mu 2024 aho yatsindiwe ku mukino wa nyuma, mu gihe RSSB Tigers yo ari ubwa mbere yitabiriye iri rushanwa.
Ni umukino watangiye ikipe ya RSSB-Tigers iyoboye kugeza urangiye. Agace ka mbere Tigers yakegukanye ku manota 35 kuri 27 y’ikipe ya Al Ahly, ikipe ya Al Ahly niyo yegukanye agace ka kabiri ku manota 20 kuri 17 ya RSSB-Tigers gusa ibi ntacyo byahinduye kuko amakipe yombi yagiye kuruhuka ikipe ya Tigers iri imbere n’amanota 52 kuri 47.
Bakiva kuruhuka, ntabwo ikipe ya Tigers yoroheye ikipe ya Al Ahly kuko yongeye kwegukana aka gace ku manota 26 kuri 19 ya Al Ahly. Agace ka kane ari nako ka nyuma, ikipe ya Al Ahly yakegukanye ku manota 29 kuri 25 gusa ibi ntacyo byahinduye ku giteranyo rusange kuko umukino warangiye ikipe ya Tigers iwegukanye ku manota 103 kuri 95.
Muri uyu mukino wari ishiraniro Leonard Craig Randall Ii wa RSSB Tigers yitwaye neza cyane aho yatsinze amanota 37, mu gihe Donovan Kennedy Williams wa Al Ahly yatsinze amanota 28.
Uretse Tigers BBC, andi makipe arimo gukina Kalahari Conference ni Johannesburg Giants yo muri Afurika y’Epfo, Al Ahly Tripoli yo muri Libya, Dar City yo muri Tanzania, Nairobi City Thunder yo muri Kenya na Petro de Luanda yo muri Angola.
RSSB Tigers izakina umukino wa kabiri ku Cyumweru tariki ya 29 Werurwe 2026 aho izacakirana na Petro de Luanda yo muri Angola.
Amakipe ane azitwara neza muri buri tsinda, azahurira i Kigali mu Rwanda, mu mikino ya kamarampaka ya nyuma, izabera I Kigali kuva tariki ya 22 kugeza 31 Gicurasi 2026.
