Urwego rw’Igihugu rw’Ubwiteganyirize mu Rwanda, (RSSB), rwagiranye ibiganiro n’urugaga rw’Abikorera, (PSF), bigaruka kuri gahunda nshya y’ubwiteganyirize bw’izabukuru, n’uburyo izabafasha mu guteza imbere ubukungu n’imibereho myiza y’abaturage.
Ibi ni ibyagarutsweho ku uwa 28 Ugushyingo 2024, mu nama yateguwe na RSSB, igaruka kuri gahunda yo kongera umusanzu w’ubwiteganyirize bw’izabukuru, aho wavuye kuri 6% waruriho, ushyirwa kuri 12%.
RSSB yashyizeho gahunda yo kongera umusanzu w’ubwiteganyirize guhera muri Mutarama 2025, mu rwego rwo kongera amafaranga ahabwa abari mu kiruhuko cy’izabukuru, bigendanye n’iyongera ry’ibiciro ku isoko.
Umuyobozi mukuru wa RSSB, Regis Rugemanshuro, yasobanuriye abari mu nama ko impinduka muri pansiyo izongerera ubushobozi abari mu zabukuru, ariko ikagira n’ingaruka nziza ku bigo by’ubucuruzi n’abikorera.
Ati “Imishinga irimo ikigo cya RSSB kigamije guteza imbere ibigo by’ubucuruzi buciriritse (SME Fund) n’ubwiyongere mu ishoramari ku isoko ry’imari n’imigabane, irimo inyungu ifatika ku rugaga rw’abikorera.”
Rugemanshuro yashimangiye ko abikorera, barimo ibigo bito n’ibiciriritse bazabona inyungu ku gishoro nyinshi, izabafasha mu guteza imbere ubucuruzi bwabo binyuze mu kigega (SME Funds), kizatangira mu gihembwe cya kabiri cy’umwaka wa 2025, kizatangirana amafaranga agera kuri miliyari 30 Frw.
Ku bijyanye n’imisanzu ya pansiyo, Rugemanshuro yavuze ko amafaranga ahabwa abari mu zabukuru aziyongera, aho kuva mu 1962 umusanzu wa pansiyo wari 6%, ukaba uzazamurwa ukagera kuri 12% mu mwaka wa 2025.
Nyuma yaho, kuva muri 2027 kugera muri 2030, hazabaho ukwiyongera ku musanzu buri mwaka, aho bizagenda byiyongera ku kigero cya 2% buri mwaka kugeza ugeze kuri 20% mu mwaka wa 2030. Ibi bizafasha mu gukemura ibibazo bya pansiyo idahagije.
RSSB ivuga ko ubu bwiyongere bw’umusanzu bugendana n’uko igihe abari mu zabukuru bahabwa pansiyo cyiyongereye, bitewe n’uko icyizere cy’u buzima ku Banyarwanda cyazamutse.
Rugemanshuro yavuze ko mu gihe igipimo cy’umusanzu w’ubwiteganyirize kizaba cyashyizwe kuri 12%, umukoresha azasabwa gutangira umukozi ayongereweho, atabikora umukozi akabyikorera.
Uretse kuba aya mafaranga azongera umusanzu w’abajya mu kiruhuko cy’izabukuru, inyongera y’imisanzu izakomeza ubukungu rusange bw’ikigega cy’ubwiteganyirize n’ubushobozi bwacyo.
