Imodoka yo mu bwoko bwa Toyota Coaster yari itwaye abanyamuryango ba FPR Inkotanyi yakoreye impanuka mu karere ka Rulindo, umuntu umwe ahita ahasiga ubuzima.
Iyi mpanuka yabaye mu gitondo cyo kuri iki Cyumweru, tariki 24, Ugushyingo 2024. Aho yari itwaye Abanyamuryango ba FPR Inkotanyi bari baturutse i Gicumbi berekeza i Musanze, mu nama y’Umuryango ku rwego rw’Intara y’Amajyaruguru.
Abantu 29 nibo bari muri iyo modoka, umwe ahita ahasiga ubuzima, abandi 28 barakomereka. Muri abo, 19 bakomeretse byoroheje, abandi barindwi bakomereka bikomeye.
Abakomerekeye muri iyi mpanuka bahise bajyanwa kuvuzwa mu bitaro bya Kinihira, Byumba, abandi bajyanywa ku bitaro bya CHUK.
Nk’uko byemejwe n’Umuyobozi w’Akarere ka Gicumbi, Nzabonimpa Emmanuel, yavuze ko ibikorwa byo kwita kuba komeretse bikomeje, ndetse hari gukorwa iperereza ngo barebe icyabiteye.
Yagize ati “ Imodoka yari igeze mu ikorosi ryo mu Rwiri nibwo yataye umuhanda ikuba uruhande. Umuntu umwe ni we wahise ahasiga ubuzima naho abandi bose bakomeretse.”
Iyi mpanuka yabereye mu muhanda wa kaburimbo Gicumbi-Base, ubwo iyi modoka yari igeze mu Karere ka Rulindo, Umurenge wa Cyungo, Akagari ka Rwili mu ikorosi riri mu Mudugudu wa Sakara.
