Guverinoma y’u Rwanda yasinyanye amasezerano n’ikigega Mpuzamahanga giteza imbere Ubuhinzi (International Fund for Agricultural Development-IFAD), agamije gutera inkunga urwego rw’ubuhinzi mu Rwanda.
Ni amasezerano yasinyiwe i Kigali kuri uyu wa kabiri tariki ya 24 Gashyantare 2026, ahagarariwe na Minisitiri w’Imari n’Igenamigambi, Murangwa Yusuf ku ruhande rw’u Rwanda.
Aya masezerano afite agaciro ka Miliyoni 78,5$, zizifashishwa mu bikorwa birimo kuhira imirima yo mu misozi ya Kayonza, no guteza imbere urwego nyongeragaciro rw’amatungo magufi
Ni amasezerano yitezweho gufasha kugabanya ubukene, kongera umusaruro n’umutekano w’ibiribwa, kuzamura ubushobozi bwo guhangana n’imihindagurikire y’ikirere mu buhinzi, no kongera amafaranga yinjira mu ngo zo mu cyaro.
Minisiteri y’Imari n’Igenamigambi mu Rwanda yagaragaje ko iyi nkunga u Rwanda rubonye, ari intsinzi ku bahinzi, intsinzi ku Gihugu muri rusange.
International Fund for Agricultural Development (IFAD) ni ikigo Mpuzamahanga gishamikiye ku Muryango w’Abibumbye (UN), cyatsinzwe mu 1997 kikaba cyibanda ku kurandura ubukene n’inzara mu bice by’icyaro mu bihugu bikiri mu nzira y’amajyambere.
IFAF ifite icyicaro gikuru i Roma, mu Butaliyani, ifitanye imikiranire n’u Rwanda kuva mu 198, aho yafashije mu kugabanya ubukene mu byaro, ishora amafaranga arenga miliyoni 791 z’amadolari ya Amerika mu mishinga 21 yagiriye akamaro ingo zisaga miliyoni 1,5.
Ingamba za 2019–2024 zibanze ku kongera umusaruro w’ubuhinzi, guteza imbere ubushobozi bwo guhangana n’imihindagurikire y’ikirere, kunoza imirire, no kongerera abahinzi bato uburyo bwo kugera ku masoko, hibandwa cyane ku rubyiruko, abagore, n’ibindi byiciro by’abatishoboye.
