Guverinoma y’u Rwanda n’ubwami bwa Maroc, basinyanye amasezerano y’ubufatanye mu bijyanye mu by’indege
Ni amasezerano yashyiriweho umukono i Montreal muri Canada,ahabera inteko Rusange ya 42 y’Umuryango uhuza ibihugu bikoresha indege za gisivile, International Civil Aviation Organization (ICAO).
Ku ruhande rw’u Rwanda, aya masezerano yashyizweho umukono na Ambasaderi w’u Rwanda muri Canada, Higiro Prosper, ari nawe uruhagarariye muri iyi nama.
Ni mu gihe ku ruhande rwa Maroc , yashyizweho umukono na Minisitiri wa Siporo ndetse n’ubwikorezi mu bwami bwa Maroc,Abdessamad Kayouh.
Muri aya masezerano, ibihugu byombi byiyemeje kwagura ubufatanye mu bijyanye n’ingendo z’indege,ubukerarugendo ndetse n’ishoramari rishingiye ku bushuti buri ku bihugu byombi.
Ibihugu byombi bisanzwe ari inshuti ndetse mu bihe bitandukanye nabwo byagiranye amasezerano y’ubufatanye mu nzego zitandukanye.
Muri uku kwezi kwa Nzeri , Ubuyobozi bw’Urwego rw’u Rwanda rushinzwe Igorora bwashyize umukono ku masezerano y’imikoranire n’urwego nk’urwo rwo muri Maroc hagamijwe guteza imbere imikoranire hagati y’izo nzego mu kunoza ibijyanye n’igorora.
Umubano w’u Rwanda na Maroc wongerewe imbaraga cyane mu 2016 ubwo habagaho ingendo z’abakuru b’ibihugu byombi.
Perezida Paul Kagame yagendereye Maroc muri Kamena 2016 naho Umwami Mohammed VI w’icyo gihugu asura u Rwanda mu Ukwakira uwo mwaka.
Tariki ya 14 Mata 2017 nibwo ibendera ry’Ubwami bwa Maroc ryazamuwe kuri ambasade yayo mu Rwanda ihita inatangira gutanga serivisi ku buryo bweruye.
