Polisi y’u Rwanda n’Urwego Rushinzwe Umutekano w’Imbere muri Qatar, rwitwa Lekhwiya, bashyize umukono ku masezerano agamije guteza imbere inyungu zihuriweho mu by’umutekano hagati y’ibihugu byombi.
Ni igikorwa cyabaye ku wa kabiri, tariki 29 Ukwakira 2024, kibera i Doha muri Qatar, nyuma y’ibiganiro byahuje Minisitiri w’Umutekano w’Imbere mu Gihugu cy’u Rwanda, Dr. Vincent Biruta na Sheikh Khalifa bin Hamad bin Khalifa Al Thani, uyobora Lekhwiya.
Aya masezerano yashyizweho umukono na DIG Sano Vincent ku ruhande rwa Polisi y’u Rwanda na Maj. Gen Hamad Hassan Al Sulait ku ruhande rwa Lekhwiya yo muri Qatar.
Ambasade y’u Rwanda muri Qatar ibinyujije kuri rubuga rwa X yatangaje ko ayo masezerano ashimangira ubufatanye hagati ya Polisi y’u Rwanda na Lwehiya, ndetse agamije guteza imbere inyungu z’impande zombi.
Ati “Hasinywe amasezerano y’imikoranire hagati ya Polisi y’u Rwanda n’Urwego Rushinzwe umutekano muri Qatar, Lekhwiya. Aya masezerano ashimangira ibikorwa by’ubufatanye kandi agateza imbere inyungu zihuriweho mu by’umutekano hagati y’u Rwanda na Qatar.”
Aya masezerano akubiyemo ingamba z’ubufatanye mu gusangira ubunararibonye no guhugura abashinzwe umutekano, harimo no guteza imbere ikoranabuhanga rigezweho.
Impande zombi zemeranyije ko bizabafasha mu guhangana n’ibyaha no kurushaho gukaza umutekano muri iki gihe.
