U Rwanda na Repubulika Iharanira Demokarasi ya Congo (RDC) bemeranyije ku mirongo y’ibikorwa by’urwego rw’umutekano ruhuriweho n’impande zombi, hagendewe ku bikubiye mu masezerano y’amahoro aherutse gusinyirwa i Washington DC.
Ibi byabereye mu nama y’uru rwego yahurije abahagarariye u Rwanda na RDC, i Addis Abeba muri Ethiopia, ku cyicaro gikuru cy’Umuryango wa Afurika Yunze Ubumwe (AU), kuva tariki ya 7 n’iya 8 Kanama 2025.
Ni inama yitabiriwe n’intumwa z’u Rwanda na DRC nk’ibihugu bihoraho muri uru rwego, ndetse n’indorerezi zaturutse muri Leta Zunze Ubumwe za Amerika, Qatar, Komisiyo y’Umuryango wa Afurika Yunze Ubumwe, n’intumwa yihariye ya AU nk’umuhuza.
Muri iya nama impande zombi zashyizeho Urwego rw’Umutekano ruhuriweho rugamije gukurikirana ishyirwa mu bikorwa ry’ibikubiye muri aya masezerano, by’umwihariko kurwanya umutwe wa FDLR n’indi mitwe yitwaje intwaro ibangamira umutekano mu Karere.
Mu byemezo byafashwe, impande zombi zumvikanye ku mirongo migari izagenderwaho mu kubahiriza aya masezerano, harimo n’uburyo bwo guhashya burundu umutwe wa FDLR no gushyira iherezo ku bikorwa byose biwushyigikira.
Hanemejwe kandi uburyo bwo gukuraho ingamba z’ubwirinzi zashyizweho n’impande zombi, hagamijwe kongera icyizere no guharanira amahoro arambye.
Mu itangazo ryasohowe nyuma y’iyo nama, ibihugu byombi byashimiye uruhare rw’Umuryango wa Afurika Yunze Ubumwe, Leta Zunze Ubumwe za Amerika ndetse na Qatar, nk’abafatanyabikorwa b’ingenzi mu gushakira amahoro Akarere k’Ibiyaga Bigari.
Massad Boulos, Umujyanama wa Perezida wa Amerika ku bijyanye n’Umugabane wa Afurika, nawe wari muri uyu muhango yavuze ko itangizwa ry’uru rwego ari intambwe ikomeye igana ku mahoro arambye.
Ati “Iyi nama yabanjirije izindi z’Urwego rushya rw’Umutekano yatumye haterwa intambwe ikomeye mu gushyira mu bikorwa amasezerano y’amahoro. Guhuza amakuru no kwicarana ku meza y’ibiganiro hagati y’u Rwanda na DRC ni bwo buryo buzageza ku mahoro arambye n’ituze mu karere.”
Impande zombi zashimangiye ko ziteguye gukomeza ibiganiro no gukorana bya hafi binyuze muri uru rwego, kugira ngo hagerwe ku mahoro ashingiye ku bufatanye, ukwizerana n’ubwubahane.
