Kuri uyu wa mbere, mu Gace Ka Mbugangari mu Mujyi wa Gisenyi, mu Karere ka Rubavu hagaragaye ibisasu bibiri bivugwa ko byoherejwe na FARDC n’imitwe y’itwaje intwaro irimo n’uw’Iterabwoba, FDLR.
Ni amakuru Umuvugizi w’Igisirikare cy’u Rwanda, Brig Gen Ronald Rwivanga, yemereye The New Times, kuri uyu wa 27 Mutarama 2025.
Amakuru yemejwe nyuma y’uko mu rukerera rwo kuri uyu wa Mbere, mu Mujyi wa Goma uturanye n’Akarere ka Rubavu haramutse humvikana amasasu, akurikira ifatwa ry’uyu mujyi n’Umutwe wa M23.
Umutekano muke mu bice biri hakurya y’Umujyi wa Gisenyi byatumye ibikorwa muri uyu mujyi bifunga birimo amaduka, abanyeshuri bakiwe ku mashuri ndetse no ku mipaka yombi ahari hasanzwe hakorerwa ubucuruzi bwambukiranya, bwahagaze.
Umutekano muke mu Burasirazuba bwa Congo n’ibice bihegereye ukomeje gufata indi ntera, nyuma y’uko Umutwe wa M23 wigaruriye Umujyi wa Goma.
Benshi mu bagize Igisirikare cya FARDC bahiye ubwoba batanga intwaro zabo ku Ngabo za Loni, abandi barahunga barimo n’abahungiye mu Rwanda, kuri ubu bari mu maboko y’abashinzwe umutekano w’Igihugu.
Ku mugoroba wo ku Cyumweru, Umuvugizi Wungirije wa Guverinoma y’u Rwanda, Alain Mukuralinda, yatangaje ko nubwo mu baturanyi imirwano imeze nabi, ariko umutekano w’u Rwanda n’Abanyarwanda urinzwe.
Ati “Icyo nakubwira cyo ni uko umutekano w’u Rwanda n’uw’Abanyarwanda by’umwihariko hariya i Rubavu n’ahandi hafi y’ahari kubera imirwano urinzwe, nta kibazo gihari.”
Yakomeje avuga ko kuba imirwano iri kubera hafi y’ibice bya Rubavu bishoboka ko hari isasu rishobora kugwa ku butaka bw’u Rwanda, ariko ko bikorerwa isuzuma hakamenyekana impamvu yatumye ahagwa.
Yasabye abaturage kuba maso ndetse abizeza ko mu gihe hari uwagira impungenge ashobora kwegera ubuyobozi bwaba ubwa gisivili cyangwa ubwa gisirikare, akabwirwa icyo gukora.
