U Rwanda ruri kumurika ubukerarugendo mu imurikagurisha rya ‘TT Warsaw Expo’ riri kubera mu gihugu cya Pologne guhera tariki ya 10-12 Ukwakira 2025.
Iri ni rimwe mu ma murikagurisha akomeye ku Isi agaragaza ibyiza biri mu bukerarugendo n’ishoramari ryabwo, rikaba riri kubera mu mujyi wa Nadarzyn, hafi ya Warsaw.
Ambasaderi w’u Rwanda muri Pologne, Prof Shyaka Anastase n’Umuyobozi w’Ishami ry’Ubukerarugendo no kurengera Ibidukikije mu Rwego rw’Igihugu rw’Iterambere, RDB, Ariella Kageruka, bitabiriye umuhango wo gutangiza iri murikagurisha.
Aba bayobozi bakiriye abashyitsi basuye igice kiri gukoreramo ‘Visit Rwanda’, babasobanurira ibyiza nyaburanga by’u Rwanda ndetse babakangurira gusura imbona nkubone ibyo u Rwanda ruri kumurikira.
TT Warsaw Expo ihuriza hamwe abafatanyabikorwa b’ubukerarugendo baturutse impande zose z’isi hagamijwe guteza imbere ubufatanye no kumenyekanisha amahirwe mashya y’ishoramari ari mu bukerarugendo.
U Rwanda ruri kumurika ibyiza nyaburanga bishingiye ku buzima bw’inyamaswa ziba mu mashyamba, umuco w’igihugu n’ibindi.
