Rwanda Airports Company yatangaje ko umuhanda uva ku Kibuga cy’Indege cya Kigali giherereye i Kanombe, uzajya uba ufunze kumanywa kuva tariki ya 20 – 28 Nzeri 2025, kubera Shampiyona y’Isi y’Amagare.
Ni ubutumwa basangije ku rubuga rwa X, mu gihe habura iminsi ibarirwa ku ntoki ngo u Rwanda rwakire Shampiyona y’Isi y’Amagare izaba ibereye ku mugabane wa Afurika ku nshuro ya mbere.
RAC yatangaje ko Polisi y’u Rwanda izaba iri gufasha abasanzwe bakoresha uwo muhanda kubereka izindi nzira banyuramo, ndetse byinshi kuri uku gufunga imihanda bizajya bigenda bitangazwa.
U Rwanda by’umwihariko umujyi wa Kigali ugeze kure imyiteguro yo kwakira Shampiyona y’Isi y’Amagare izahabera kubaba tariki ya 21 kugeza 29 Nzeri 2025.
Abatuye mu Mujyi wa Kigali barimo abanyeshuri n’abakozi basabwe kuzaba bagumye mu rugo, kugirango hirindwe ko bagorwa n’ingendo cyane ko inzira basanzwe bakoresha zizaba zirimo kuberamo irushanwa.
Imihanda izaba iri gukoreshwa ku munsi wa mbere kugeza ku wa gatatu (21-23 Nzeri), bisi zizifashisha imihanda irimo: Nyanza–Nyabugogo Canal Olympia–RP Nyarutarama–Ryayumva–Nyabugogo, Nyanza-Downtown, Canal Olympia–Gikondo–Cercle Sportif–Kiyovu–City Hall–Nyabugogo Market–Downtown, ndetse na Nyanza–Remera–Kimironko.
Hashobora kandi kwifashishwa imihanda ya Canal Olympia – Gikondo – Sodoma – Gatenga – Kicukiro Center – St Joseph – Kabeza – Giporoso, ndetse n’indi irimo Kanombe – Kabuga – Kimironko.
Indi nzira ni Kimironko – Kibagabaga – Akabuga ka Nyarutarama – Kinamba – Nyabugogo (Downtown), hamwe n’iyihuza Downtown – Kimironko, Remera, cyangwa Downtown – Kinamba – Kacyiru – Gishushu – Gasabo Office – Nyagatovu – Kimironko.
Indi mihanda yunganira iyi nayo isbobora kunyurwamo ni Mugendo–Nunga–Rebero–Gikondo–Rugunga–Biryogo–Downtown, hamwe n’uwo Kuri 12–Kigali Parents–Kimironko–Kibagabaga–Kagugu–Utexrwa–Kinamba–Downtown.
Umuhanda wa 3 uzanyura kuri Kuri 12 – Giporoso – Kabeza – Niboye – Kicukiro Centre – Gatenga – Gikondo – Rugunga – CHUK – Downtown.
Umuhanda wa 4 uzaba uca kuri Gahanga Cricket – Kagasa Cell – Rwabutenge – Muyange – Kicukiro Centre. Umuhanda wa 6 uzaca kuri Nyanza Junction – Rebero – Gikondo – Rugunga – Biryogo – Downtown.
Ku rundi ruhande, amakamyo azakoresha inzira ya Free Zone–Birembo–Kinyinya–Gasanze–Nyacyonga–Gatsata–Nyabugogo–Giti cy’inyoni.
