Banamwana Camarade yagizwe Umutoza wa Bugesera FC mu gihe gisigaye ngo umwaka w’imikino wa 2024/25 urangire.
Itangazo Bugesera FC yashyize hanze kuri uyu wa Gatatu, tariki ya 23 Mata 2025, rivuga ko Banamwana Camarade ari we mutoza wayo mushya, ni nyuma yo gutandukana na Haringingo Francis ku wa Kabiri.
Rigira riti “Bugesera FC iramenyesha abakunzi bayo ko Banamwana Camarade ari we ugiye gutoza ikipe mu mikino yose isigaye.”
Iyi Kipe yo mu Burasirazuba yavuze ko azaba yungirijwe na “Peter Otema na Ndayishimiye Eric “Bakame.”
Haringingo Francis yatandukanye na Bugesera FC amaze kuyitoza imikino 44 kuva mu Ugushyingo 2023.
Yatsinze imikino 10, anganya 17, atsindwa 17.
Haringingo Francis Christian uzwi ku izina rya ’Mbaya’ wari Umutoza Mukuru wa Bugesera FC yasezeye hamwe na Nduwimana Pablo wari umwungirije.
Yasize Bugesera FC ku mwanya wa 15 muri Shampiyona y’u Rwanda n’amanota 24, irusha Vision FC ya nyuma [16] amanota ane.
