Itsinda ry’urubyiruko rw’Abanyarwanda baba mu mahanga baturutse mu bihugu birindwi, riri mu Rwanda muri gahunda y’ibyumweru bibiri yo kungurana ubumenyi n’umuco, basuye icyicaro gikuru cy’ingabo z’igihugu (RDF) giherereye ku Kimihurura.
Urwo rubyiruko rwakiriwe n’Umuvugizi w’Ingabo z’u Rwanda, Brig Gen Ronald Rwivanga, wari uhagarariye Umugaba Mukuru w’Ingabo z’u Rwanda, ku mugoroba wo ku wa gatatu, tariki ya 9 Nyakanga 2025.
Muri uru ruzinduko, urubyiruko rwahawe ikiganiro kigari ku nshingano za RDF n’uburyo igira uruhare runini mu kurinda umutekano w’igihugu, uruhare mu bikorwa bigamije guteza imbere ibikorwa by’iterambere ry’igihugu, no kugarura amahoro mu bihugu hirya no hino muri Afurika.
Brig Gen Rwivanga yagaragaje ko indangagaciro shingiro za RDF ari ikinyabupfura, gukunda igihugu no gukorera abaturage, anibutsa ko imikoranire hagati y’abasivili n’ingabo ari ingenzi cyane mu rugendo rw’iterambere u Rwanda rurimo.
Yashimangiye ko RDF ifite uruhare rukomeye mu kubaka igihugu cyari cyarasenywe na Jenoside yakorewe Abatutsi mu 1994, ndetse no mu guteza imbere umutekano mu Karere.
Urubyiruko rwasuye RDF rwagaragaje inyota yo kumenya byinshi, rubaza ibibazo bitandukanye mu kiganiro cyimbitse bagiranye n’abayobozi batandukanye ba RDF.
Bagaragaje ko banyuzwe no kumenya uburyo ingabo z’u Rwanda zifasha mu kubaka igihugu, gusigasira amahoro mu karere no gufasha abaturage binyuze mu bikorwa byo kubegera no kubaha serivisi zitandukanye.
